"მთავარი ტროლები ჯერ კიდევ რჩებიან ჩვენს ქვეყანაში",— ასე გამოხმაურა პარლამენტის თავმჯდომარე არჩილ თალაკვაძე Facebook-ის მიერ დეზინფორმაციული გვერდებისა და ყალბი ანგარიშების დაბლოკვას. კომპანია აცხადებს, რომ ამ ანგარიშების კვალი ქართულ ოცნებამდე მიდის, თალაკვაძე კი ამტკიცებს, რომ "არაფერი ისეთი ფეისბუქის განცხადებაში" არ წერია თანაპარტიელების მსგავსად, ოპონენტების მინუსებზე საუბრობს.

რაც შეეხება $316 000, რომელიც ფეისბუქის განცხადებით, პროსახელისუფლებო გვერდების რეკლამირებაში დაიხარჯა, თალაკვაძე ამბობს, რომ ის სუბიექტები, ვინც ხელისუფლების წინააღმდეგ დეზინფორმაციას ავრცელებენ, შესაძლოა, ბევრად მეტ თანხას ხარჯავდნენ.

"დარწმუნებული ვარ, რომ ბევრად მეტიც უღირთ როგორმე ხელისუფლება გააშავონ, მაგრამ არ გამოუვათ. არჩევნებში მოქალაქეები მონაწილეობენ და არა ტროლები", — განაცხადა მან იმედის ეთერში.

20 დეკემბერს ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.

როგორც ატლანტიკური საბჭოს ციფრული გამოძიების კვლევის ლაბორატორია აცხადებს, გვერდები უმეტესად ქართულ აუდიტორიაზე მუშაობდნენ და ავრცელებდნენ ისეთ სოციო-პოლიტიკურ კონტენტს, რომელიც საზოგადოების პოლარიზაციას უწყობდა ხელს, თავს ესხმოდა ოპოზიციურ პარტიებსა და სამოქალაქო საზოგადოებას და საქართველოს დასავლელი პარტნიორების, კონკრეტულად კი ამერიკის შეერთებული შტატების დისკრედიტაციას ეწეოდა.