პარლამენტის თავმჯდომარე არჩილ თალაკვაძემ გაუქმებული ფეუსბუქგვერდების შესახებ ატლანტიკური საბჭოს კვლევაზე და თქვა რომ ანალოგიური კვლევების გაკეთება ქართულ ოცნებასაც შეუძლია, "ამდენი დრო რომ ჰქონდეთ".

"დღეს რომ ხელისუფლებაში არ გვქონდეს უამრავი საქმე, ცალი ხელით პასუხი არ გვქონდეს გასაცემი დეზინფორმატორებზე და მართლა რეალურ ტროლებზე და მეორე ხელით, სახელმწიფო არ გვქონდეს სამართავი, ერთ ოფისს ვიქირავებდით და დავიწყებდით კვლევას", — თქვა არჩილ თალაკვაძემ გადაცემაში იმედის კვირა.

ატლანტიკური საბჭოს ციფრული გამოძიების კვლევის ლაბორატორიამ (DFRLab) ფეისბუქის გამოძიების პარალელურად საკუთარი კვლევა ჩაატარა. DFRLab-ს თავდაპირველად საქართველოში ორგანიზებული საეჭვო ოპერაციების შესახებ ინფორმაცია ფეისბუქმა მიაწოდა.

ლაბორატორიის განცხადებით, გამოძიებით დადგინდა, რომ გაუქმებული ვებგვერდები ქართულ აუდიტორიაზე იყო გათვლილი, ავრცელებდა "დამაპირისპირებელ სოციო-პოლიტიკურ შინაარსს, რომელიც ივანიშვილს და მთავრობაში მის მოკავშირეებს უჭერდა მხარს და ცდილობდა საქართველოს დასავლელი პარტნიორების, განსაკუთრებით კი, შეერთებული შტატების დისკრედიტაციას".

20 დეკემბერს ფეისბუქმა ასეულობით გვერდი და ანგარიში დაბლოკა, რომელიც მათი განცხადებით, მმართველ გუნდთან იყვნენ კავშირში და დეზინფორმაციას ავრცელებდნენ. მათი თქმით, ამ გვერდებისა და ანგარიშების რეკლამირებაში თითქმის $316 ათასი დაიხარჯა.

ფეისბუქის განცხადებაში ნათქვამია, რომ ამჟამად უკვე წაშლილი გვერდები მმართველ ძალასთან, ქართულ ოცნებასთან იყვნენ დაკავშირებულები, თუმცა თავს პარტიებად, მედიებად, რეალურ პირებად და აქტივისტთა ჯგუფებად აჩვენებდნენ.

"მიუხედავად იმისა, რომ ანგარიშების უკან მდგომი ადამიანები ცდილობდნენ, შეენიღბათ კოორდინირებული მუშაობა, კვალს სარეკლამო კომპანია პანდასთან და ქართული ოცნების ხელისუფლებასთან მივყავართ", — ნათქვამია განცხადებაში.