სუიციდური აზრების მქონე ადამიანების დასახმარებლად სპეციალური, 24-საათიანი ცხელი ხაზი საქართველოში არ არსებობს. ფსიქიკური ჯანმრთელობის განვითარების სტრატეგია მთავრობამ 2014 წელს დაამტკიცა. დოკუმენტის მიხედვითაც ქვეყანას სუიციდის პრევენციის გეგმა 2015-2016 წლებში უნდა შეემუშავებინა. რა ეტაპზეა ეს გეგმა და რას მოიცავს კონკრეტულად, ამაზე On.ge ჯანდაცვის სამინისტროს დაუკავშირდა, თუმცა "მოუცლელობის" მიზეზით ინტერვიუზე უარი თქვეს.

შინაგან საქმეთა სამინისტროს სტატისტიკით, 2018 წელს სუიციდის 389 და სუიციდის მცდელობის 477 ფაქტი დაფიქსირდა, ხოლო 2019 წლის 6 თვის (იანვარი-ივნისი) განმავლობაში 219 ადამიანმა სცადა თვითმკვლელობა, 207-მა კი სიცოცხლე სუიციდით დაასრულა.

საქართველოში მოქმედი სატელეფონო ფსიქოლოგიური მომსახურებები ხშირ შემთხვევაში სამუშაო საათებში მუშაობს, მათ შორის:

  • პროექტი ბავშვთა დახმარების ცხელი ხაზი (116 111; 2 421 422;) არასამთავრობო ორგანიზაცია საზოგადოებრივი ჯანდაცვის ფონდს ეკუთვნის და შექმნილია ბავშვთა მიმართ ძალადობის წინააღმდეგ ბრძოლისთვის. მათ ნომერზე ყველა დაინტერესებულს შეუძლია სატელეფონო კონსულტაციის მიღება 10-დან 18 საათამდე;
  • განათლების სამინისტროს მანდატურების სამსახურის ბაზაზე არსებული ფსიქოლოგიური საკონსულტაციო მომსახურების 24-საათიან ცხელი ხაზზე (08 00 00 00 88) ნებისმიერ ადამიანს შეუძლია დარეკვა კონსულტაციის მიღება;
  • განათლების სამინისტროს ბაზაზე არსებული ფსიქო-სოციალური მომსახურების ცენტრის ცხელი ხაზი: 2 200 220 (3025) და მონიტორინგის სამმართველოს ცხელი ხაზი 2200220 (3335), ასევე, სამუშაო საათებში მუშაობს.

ფსიქოლოგიური დახმარების ასოციაციის "ნდობა", რომელიც სატელეფონო გასაუბრების გზით სუიციდური აზრების მქონე ადამიანებს ეხმარებოდა, 2014 წელს დაფინანსების შეწყევეტის მიზეზით გაუქმდა. ფსიქოლოგი ნანა აღაპაშვილი 24 წლის განმავლობაში ხელმძღვანელობდა ასოციაციას. იგი On.ge-ს უყვება, რომ ცხელ ხაზზე წელიწადში ხუთი ათასზე მეტი ზარი შედიოდა:

"ყველა ზარის შინაარსი სუიციდური არ იყო, მაგრამ იყო საუბარი გარკვეულ ემოციურ პრობლემეზე. ჩვენ შკალებით ვაფასებდით პიროვნების სუიციდურობას, რა ფიქრები ჰქონდათ. იყვნენ ადამიანებიც, რომლებიც საუბრობდნენ დაგეგმილ სუიციდზე. ცოტა რთული იყო, ტელეფონით არ გვქონდა უკან გადარეკვის საშუალება... ყოფილა შემთხვევა მეორე, მესამე დღეს დაურეკავთ და მადლობა უთქვამთ, რომ აზრი შეიცვალეს".

ნანა აღაპიშვილის თქმით, ცხელ ხაზზე გასაუბრებისას სუიციდალობა მცირდება, ემოციულობა და დეპრესიოლობა მცირდება:

"ამის მტკიცებულებები არსებობს... მთელ მსოფლიოში არსებობს ქსელები. ჩვენ გვქონდა შემთხვევა, როცა ჩვენი ტელეფონი არ მუშაობდა, გვიკავშირდებოდა ერთი ადამიანი, რომელმაც თქვა, რომ ისეთ მდგომარეობაში აღმოვძჩნდი უცხოეთში ვრეკავდი ცხელ ხაზზეო. მას საშუალებაც ჰქონდა და ენაც იცოდა, რომ უცხო ენაზე დალაპარაკებოდა კონსულტანტს. ამის ფუფუნება ყველას არ აქვს".