პარლამენტის წევრი, ეკა ბესელია, მოსამართლეებს მოუწოდებს საკუთარი კანდიდატურები თავად მოხსნან და ამით გაათავისუფლონ პარლამენტი და ქვეყანა მძიმე კრიზისისგან.

"ეს იქნება უზენაესი სასამართლოს ოკუპაცია, თუ კენჭისყრები ჩატარდება. ნებისმიერ მოსამართლეს გაუჭირდება იყოს ნდობის მატარებელი. მოხსნან კანდიდატურები და მიბაძონ ზაზა თავაძეს", — განაცხადა ბესელიამ TV პირველის ეთერში.

მისი თქმით, მოსამართლეებმა არ უნდა იფიქრონ, რომ ამგვარი კენჭისყრა მათი უვადობის გარანტი იქნება, რადგანაც პროცესი არის ლეგიტიმაციადაკარგული.

დღეს მიმდინარე სხდომაზე, სადაც უვადო მოსამართლეების დასანიშნად კენჭისყრა უნდა გამართულიყო, შესვენება გამოცხადდა. ამის მიზეზი სხდომათა დარბაზში გაურკვეველი სითხის დაღვრა გახდა, რასაც სპეციფიკური სუნი ჰქონდა. უსაფრთხოების მიზნით, პარლამენტის თავმჯდომარემ სხდომა გაურკვეველი დროით შეწყვიტა.