Justice International-ის აღმასრულებელი დირექტორის, ნიკა ჯეირანაშვილის შეფასებით, ჰააგაში მოსამართლის საქართველოდან წარდგენა ქვეყნისთვის ძალიან მნიშვნელოვან პოზიცია და დიდი პასუხისმგებლობაა საქართველოს იუსტიციის სამინისტროს განაცხადს იგი ფეისბუქის გვერდზე ეხმაურება.

ჯეირანაშვილის ცნობით, ნომინირება ხუთ-ექვს თვეში, 2020 წლის ივნის-ივლისში იქნება, მანამდე კი საქართველომ რიგი პროცესები უნდა გაიაროს:

  • "პირველ რიგში უნდა შეიქმნას სასამართლოში კანდიდატურის ნომინირების წესები, რომლებიც უზრუნველყოფს კანდიდატთა შერჩევის გამჭვირვალე და სამართლიან პროცესს;
  • უნდა შეიქმნას კანდიდატის შესარჩევი ორგანო, რომელიც მთავრობისგან დამოუკიდებელად ჩაატარებს შერჩევის პროცედურებს. ეს ორგანო უნდა მოიცავდეს სასამართლოს, იურიდიული წრეების, სამოქალაქო საზოგადოების, სახალხო დამცველისა და სისხლის სამართლის საერთაშორისო სასამართლოს საქართველოს კოალიციის წარმომადგენლებს;
  • ქვეყანამ თავი უნდა შეიკავოს ისეთი კანდიდატის ნომინირებისგან, რომელიც ბოლო 5 წლის განმავლობაში მუშაობდა მთავრობის მოხელედ, ან ასოცირდება მთავრობასთან. ამასთანავე, უზუნველყოფილი უნდა იყოს, რომ კვალიფიციურ კანდიდატებს, რომლებსაც შეიძლება არ აქვთ პოლიტიკური კავშირები, ექნებათ ნომინირების თანაბარი შანსი".

საქართველო ჰააგის სისხლის სამართლის საერთაშორისო სასამართლოს მოსამართლეობის კანდიდატს 2020 წლისთვის პირველად წარადგენს. ამის შესახებ იუსტიციის მინისტრმა თეა წულუკიანმა, ჰააგის სასამართლოს ასამბლეის ფარგლებში სიტყვით გამოსვლისას თქვა. სხვადასხვა რეგიონიდან 6 მოსამართლე უნდა აირჩეს. საქართველო მოსამართლეობის კანდიდატის წარდგენას აღმოსავლეთ ევროპის კვოტით აპირებს. მომავალ წელს უფლებამოსილების ვადა ჩეხ მოსამართლეს გასდის.