ლონდონში უცნობი კაცი გამვლელებს თავს დაესხა და დანით ჭრილობები მიაყენა. ორი მოქალაქე დაიღუპა, ხოლო რამდენიმე დაჭრილია. თავდამსხმელის ვინაობა და მოტივები ჯერჯერობით უცნობია.

პოლიციამ თავდასხმას ტერორისტული აქტის კვალიფიკაცია მისცა. ინციდენტი ლონდონის ხიდზე მოხდა. სავარაუდო თავდამსხმელი პოლიციამ მოკლა. სამართალდამცავების ინფორმაციით, მას წელზე ასაფეთქებელი ჰქონდა მიმაგრებული.

ლონდონის ხიდი ბრიტანეთის დედაქალაქის ტურისტულ ცენტრში მდებარეობს. ორი წლის წინ აქ მასშტაბური ტერაქტი მოხდა, რა დროსაც რვა ადამიანი გარდაიცვალა, ხოლო ათობით დაშავდა.

29 ნოემბრის თავდასხმის შემდეგ სოციალურ ქსელებში მალევე გამოჩნდა ინციდენტის ამსახველი ვიდეომასალები, რომელშიც ჩანს, რომ პოლიცია სავარაუდო თავდამსხმელს მისდევს და შემდეგ ესვრის. ერთ-ერთი ვიდეოში კი ჩანს, რომ თავდამსხმელს რამდენიმე ადამიანი აკავებს და დანას ართმევს.

ამჟამად ლონდონის ხიდი და მასთან დაკავშირებული ქუჩები გადაკეტილია. ადგილზე მობილიზებულია პოლიცია.