ქართული ოცნების ყოფილი წევრი, მარიამ ჯაში ფიქრობს, რომ ის მაჟორიტარები, რომლებმაც პროპორციულ საარჩევნო სისტემაზე გადასვლის კანონპროექტს მხარი არ დაუჭირეს, დამოუკიდებლად არ მოქმედებდნენ. ამის შესახებ მან TV პირველის ეთერში ისაუბრა.

დეპუტატის თქმით, ამ ეჭვს ის ბადებს, რომ ყველა მნიშვნელოვანი გადაწყვეტილების მიღების დროს უმრავლესობა პარტიის ლიდერშიფს ეთანხმებოდა.

"არასდროს ბატონ ბიძინას და უმრავლესობის ლიდერებს არ გაუკეთებიათ საწინააღმდეგო პოზიცია, მაგრამ ვიცით რა — არაერთი მნიშვნელოვანი გადაწყვეტილების მიღების დროს უმრავლესობა პრაქტიკურად ყოველთვის ეთანხმებოდა პოლიტიკურ ლიდერშიფს გადაწყვეტილებებში, [ასეთ დროს] რთულია დაიჯერო, რომ ეს იყო [მაჟორიტარების] დამოუკიდებელი მოქმედება", — აღნიშნა მან.

ამავე თემაზე: ნეტავ, 2020 წელს პროპორციულზე გადასვლის პირობა არ მიგვეცა — მარიამ ჯაში

მარიამ ჯაში იმ დეპუტატებს შორისაა, რომლებმაც ქართული ოცნება და საპარლამენტო უმრავლესობა პროტესტის ნიშნად დატოვეს. ეს გადაწყვეტილება მათ მას შემდეგ მიიღეს, რაც მმართველმა გუნდმა პროპორციულ საარჩევნო სისტემაზე გადასვლის კანონპროექტს მხარი არ დაუჭირა.