რუსთავის მაჟორიტარმა დეპუტატმა, გიორგი ბეგაძემ საპარლამენტო უმრავლესობა და ქართული ოცნება დატოვა. ამის შესახებ ის Facebook-ზე წერს.

მისი თქმით, ეს გადაწყვეტილება ქართული ოცნების მიერ პროპორციულ საარჩევნო სისტემაზე გადასვლის კანონპროექტის ჩაგდებას უკავშირდება.

"დარწმუნებული ვიყავი, რომ შევძლებდით საზოგადოებისთვის და საერთაშორისო თანამეგობრობისთვის მიცემული პირობის შესრულებას! სამწუხაროდ, ჯანმრთელობის მდგომარეობის გამო, ვერ ვესწრებოდი ბოლო დღეების სხდომებს და ვერც ვხედავდი რაიმე განსაკუთრებულ რისკს, რომ საკითხს არ ექნებოდა საკმარისი მხარდაჭერა. მოცემული რეალობიდან გამომდინარე, მიწევს ჩემთვის რთული გადაწყვეტილების მიღება", — აღნიშნავს დეპუტატი.

ეს არის მე-9 დეპუტატი, რომელმაც საპარლამენტო უმრავლესობა და ქართული ოცნება დატოვა. პროპორციულ სისტემაზე გადასვლის კანონპროექტის ჩაგდების შემდეგ გუნდი, უმრავლესობა და თანამდებობები 8 დეპუტატმა დატოვა, მათ შორის თამარ ჩუგოშვილმა, თამარ ხულორდავამ და მარიამ ჯაშმა.