„გოგოების წინსვლა ნიშნავს მიზნებისკენ წინსვლას: გლობალური მოძრაობა მონაცემებისთვის“ - გოგონათა საერთაშორისო დღის წლევანდელ თემად სწორედ ეს დევიზი შეირჩა. მხოლოდ სანდო და ხარისხიანი მონაცემების წყალობითაა შესაძლებელი მდგრადი განვითარების დაგეგმვა და მასში გოგონების საჭიროებების და პრიორიტეტების გათვალისწინება - ასეთი მონაცემები პოლიტიკოსებს, საზოგადოების წარმომადგენლებს, სამოქალაქო საზოგადოების ორგანიზაციებს, ახალგაზრდულ ორგანიზაციებს, აქტივისტებსა და თავად გოგონებს საშუალებას მისცემს უკეთ განსაზღვრონ ის პოლიტიკა და ინიციატივები, რომლებიც დადებით გავლენას მოახდენს მილიონობით გოგონას ცხოვრებაზე მსოფლიოს სხვადასხვა კუთხეში.

ინვესტირება მოზარდი გოგონების განვითარებაში მათ საშუალებას მისცემს იარონ სკოლაში, შეიძინონ საჭირო ცოდნა და უნარ-ჩვევები, მხოლოდ ამის შემდეგ შექმნან ოჯახი, ჰყავდეთ ჯანმრთელი შვილები, ჰქონდეთ მეტი შემოსავალი და ხელი შეუწყონ თავიანთ ოჯახებსა და საზოგადოებას. მაქსიმალური შედეგის მისაღებად და პროგრესის მისაღწევად აუცილებელია ინვესტირება ეყრდნობოდეს მაღალი ხარისხის მონაცემებს. ეს განსაკუთრებით საყურადღებოა იმ გოგონების საჭიროებების განსაზღვრისა და მოგვარებისთვის, რომლებიც მოწყვლად ჯგუფებს მიეკუთვნებიან, ანუ, მათზე ვის შესახებაც ხშირ შემთხვევაში ყველაზე ნაკლები ვიცით.

სქესისა და ასაკის მიხედვით დაყოფილი მონაცემთა ბაზა მხოლოდ 50-მდე ქვეყანას გააჩნია. მოზარდების შესახებ მონაცემებთან დაკავშირებული ხარვეზები ბევრ სხვადასხვა სფეროში გვხვდება, მათ შორის არის: სიღარიბე, ძალადობა, სიკვდილიანობა ორსულობის პერიოდის გართულებებისა და მშობიარობის შედეგად, განსაკუთრებით, 10-დან 14 წლამდე ასაკობრივ ჯგუფში. შედეგად, გამოწვევები, რომლებიც ბევრი გოგონას წინაშე დგას, გაუთვალისწინებელი რჩება და საზოგადოების ეს ღირებული ნაწილი ვერ ახერხებს თავისი პოტენციალის სრულ რეალიზებას.

უნდა გვახსოვდეს, რომ ყველა მოზარდ გოგონას აქვს უფლება უსაფრთხოდ და წარმატებით მიაღწიოს სრულწლოვანების ასაკს და ისარგებლოს ყველა იმ შესაძლებლობებით, რომელიც მას ეკუთვნის. სწორედ ახლა არის დრო, გამოვიყენოთ ხარისხიანი მონაცემები, როგორც განვითარებისა და მოზარდ გოგონათა უფლებების დაცვისა და ხელშეწყობის ერთ-ერთი მნიშვნელოვანი ინსტრუმენტი.

ახალი ანგარიში მსოფლიოს მოსახლეობის შესახებ (State of World Population), რომელსაც გაეროს მოსახლეობის ფონდი (UNFPA) მიმდინარე თვის ბოლოს წარადგენს, ნათლად აჩვენებს, თუ როგორ განაპირობებს მოზარდი გოგონების მიმართ დღეს გამოჩენილი მხარდაჭერა ჩვენს საერთო კეთილდღეობას მომავალში.

და რაც ყველაზე მთავარია, გაეროს მოსახლების ფონდი (UNFPA) მზად არის მხარი დაუჭიროს მოზარდ გოგონებს, რათა მათ შეძლონ თავიანთი პოტენციალის სრულად რეალიზება და განსაზღვრონ საკუთრი მომავალი.

11 ოქტომბერს მსოფლიო გოგონათა საერთაშორისო დღეს აღნიშნავს. გახსოვდეთ, ყოველი გოგო მნიშვნელოვანია, ამიტომ არასოდეს დახაროთ თავი და ნურავის მისცემთ უფლებას დაგჩაგროთ.