დღეს, 30 სექტემბერს, 20 საათზე ბათუმში, ევროპის მოედანზე აჭარის საზოგადოებრივი მაუწყებლის მხარდასაჭერად აქცია დაიგეგმა. აქციის ორგანიზატორი თავისუფალ ჟურნალისტთა სახლია.

აჭარის საზოგადოებრივი მაუწყებლის თანამშრომელთა ნაწილმა დღეს სპეციალური განცხადებით აკრედიტებულ დიპლომატიურ მისიებსა და ადგილობრივ და საერთაშორისო ორგანიზაციებს მიმართა. მათი განმარტებით, მაუწყებლის სარედაქციო დამოუკიდებლობა საფრთხის წინაშე დგას.

განცხადებაში განხილულია ტელევიზიის ყოფილი დირექტორის გადაყენება და ახალის არჩევის რამდენიმე უშედეგო მცდელობა. თანამშრომლები აცხადებენ, რომ 6 თვე, სანამ ეს პროცესები გრძელდებოდა, მათ შეძლეს სარედაქციო დამოუკიდებლობის შენარჩუნება, თუმცა ახლა განსხვავებული ვითარებაა.