იუსტიციის მინისტრი, თეა წულუკიანი ამბობს, რომ საქართველოსა და რუსეთის საგარეო საქმეთა მინისტრებს შორის შეხვედრა ბოლო წლების ერთ-ერთი უმნიშვნელოვანესი იყო. ამის შესახებ მან ჟურნალისტებს უთხრა.

წულუკიანი იმედს გამოთქვამს, რომ ეს და სხვა შეხვედრები საოკუპაციო ხაზთან დაძაბულობის დეესკალაციას ხელს შეუწყობს.

"თუ ვინმე იმას ვერ ხედავს, რომ საოკუპაციო ხაზთან არის ყოველდღიურად დაძაბულობა მაღალი ხარისხის, თუ ვინმე იმას ვერ ხედავს, რომ საოკუპაციო ხაზის ორივე მხარეს ოჯახებში არის უმძიმესი მდგომარეობა, რომ საოკუპაციო ხაზზე გადის ჩვენი ეროვნული უშიშროების, ტერიტორიული მთლიანობისა და სამომავლო დეოკუპაციის მიზნები, ვინც ამას ვერ ხედავს, ძალიან ცდება და ვფიქრობ, რომ ეს იყო ბოლო წლების ერთ-ერთი უმნიშვნელოვანესი შეხვედრა ორი ქვეყნის საგარეო საქმეთა მინისტრებს შორის", — თქვა წულუკიანმა.

ნიუ იორკში გაეროს გენერალური ასამბლეის ფარგლებში გამართულ ერთ-ერთი მაღალი დონის შეხვედრაზე საქართველოსა და რუსეთის საგარეო საქმეთა მინისტრები ერთმანეთს შეხვდნენ. 2008 წლის შემდეგ რუსეთ-საქართველოს საგარეო საქმეთა სამინისტროების წარმომადგენლებს დიპლომატიური კონტაქტი არ ჰქონიათ.