ადამიანის უფლებათა ცენტრის ინფორმაციით, დარღვევების აბსოლუტური უმრავლესობა კომისიის წევრთა არაკომპეტენტურობით იყო გამოწვეული:

"დარღვევების აბსოლუტური უმრავლესობა საარჩევნო ადმინისტრაციის წარმომადგენლების არაკვალიფიციურობით, საარჩევნო კანონმდებლობის არცოდნით იყო გამოწვეული. პრობლემები განსაკუთრებით ქვემო ქართლის რეგიონში, ეთნიკური უმცირესობებით დასახლებულ სოფლებში გამოვლინდა, სადაც საარჩევნო უბნებზე კომისიის წევრთა არაკომპეტენტურობის გამო იქმნებოდა დაძაბულობა და ზოგჯერ კონფლიქტები."

ადამიანის უფლებათა ცენტრის ცნობით, რომ ზოგიერთი საარჩევნო უბნის მიმდებარე ტერიტორიაზე პარტიების კოორდინატორებისა და აგიტატორების გადამეტებული აქტიურობა და ამომრჩეველთა კონტროლის მცდელობა აღინიშნებოდა. მიუხედავად იმისა, რომ საარჩევნო კოდექსი არ კრძალავს საარჩევნო უბნის მიმდებარე ტერიტორიაზე პარტიათა კოორდინატორების ყოფნას და აგიტაციას, ადამიანის უფლებათა ცენტრი ანგარიშში ერთ-ერთ მთავარ პრობლემად ასახავს თითქმის ყველა საარჩევნო უბნის მიმდებარე ტერიტორიაზე საარჩევნო სუბიექტების, კოორდინატორების მობილიზებას, რომლებიც აღწერდნენ მოსულ ამომრჩევლებს:

"იყო შემთხვევები, როდესაც საარჩევნო უბანთან შეკრებილი სხვადასხვა პარტიების აგიტატორები, კოორდინატორები და მხარდამჭერები ერთმანეთს უპირისპირდებოდნენ და ზოგჯერ მსგავსი დაპირისპირება ფიზიკური შეხლა-შემოხლით მთავრდებოდა."

ადამიანის უფლებათა ცენტრი ასევე ავრცელებს ინფორმაციას, რომ ბევრ საარჩევნო უბანზე მიღებული ბიულეტენების რაოდენობა ნაკლები იყო სიაში არსებული ამომრჩევლის რაოდენობაზე:

"მართალია, უბანზე ყველა ამომრჩეველი არ მისულა, მაგრამ მნიშვნელოვანია, კანონით დადგენილი ნორმების შესრულება, რომ აცილებული იყოს ყველა რისკი, რაც შეიძლება შეექმნათ ამომრჩევლებს კენჭისყრის პროცესში."