ნიკა მელია მის მიმართ დაწესებული აკრძალვის "დემონსტრაციულად დარღვევის" გამო პროკურატურაში დაიბარეს. ამის შესახებ საგამოძიებო უწყება განცხადებას ავრცელებს. მათი თქმით, 10 სექტემბერს მელიამ საგამოძიებო ორგანოს უარის მიუხედავად, საცხოვრებელი ადგილი დატოვა და ტელეკომპანია კავკასიაში წავიდა.

პროკურატურის განცხადებით, ნიკა მელიას განუმარტავენ, რომ აღნიშნული ქმედება წარმოადგენს აღკვეთის ღონისძიების გამოყენების პირობის დარღვევას და განმეორების შემთხვევაში, მის მიმართ, შესაძლოა, უფრო მკაცრი აღკვეთის ღონისძიება გამოიყენონ.

"პირველი მომართვისთანავე, ნიკანორ მელიას პროკურატურისგან მიეცა თანხმობა გამოცხადებულიყო საქართველოს პარლამენტში და განეხორციელებინა სადეპუტატო უფლებამოსილება. გარდა ამისა, მას აქვს სრულყოფილი კომუნიკაცია მედიასთან საცხოვრებელი სახლიდან", — ნათქვამია უწყების განცხადებაში.

10 სექტემბერს ნიკა მელიამ ფეისბუქ ლაივში თქვა, რომ შეზღუდვის მიუხედავად ტელეკომპანია კავკასიაში მისვლას მაინც მივიდოდა. ნიკა მელიას თქმით, ინტერვიუს შესახებ მისმა ადვოკატმა აცნობა პროკურორს, პასუხად კი კატეგორიული უარი მიიღო.

"რა სისულელეს გააკეთებს ქართული ოცნება, წარმოდგენა არ მაქვს. ვერ ამიკრძალავს იმას, რისი აკრძალვის უფლება არ აქვთ. ვარ ისეთივე დეპუტატი, როგორიც დანარჩენი 149. თუ დღეს დავემორჩილები ივანიშვილის ამ იდიოტობას და არ წავალ ტელეკომპანია კავკასიაში, ხვალ შეიძლება მითხრან იგივე წარმატებით, რომ ერთი ოთახიდან მეორეში არ გავიდე", — თქვა მელიამ.

ნიკა მელია მისთვის 20 ივნისის ღამეს ჯგუფური ძალადობის საქმეზე ბრალის წაყენებისა და აღკვეთის ღონისძიების შეფარდების შემდეგ პირველად მივიდა პარლამენტში.

ნიკა მელიას 20 ივნისის საქმეზე აღკვეთის ღონისძიებად გირაო შეეფარდა და სახლიდან გასვლისთვის პროკურატურის ნებართვა სჭირდება. მას ბრალი აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის სისხლის სამართლის კოდექსის 225-ე მუხლის პირველი და მეორე ნაწილებით წაუყენეს.