ქართული ოცნების წევრმა, კახა კალაძემ ბრიფინგი გამართა და განცხადა, რომ არჩევნების პროცესში გამოვლენილ ყოველ სამართალდარღვევას სათანადოდ გამოიძიებენ. ჟურნალისტების შეკითხვებს მარნეულში მომხდარ ინციდენტთან დაკავშირებით, კალაძემ კონკრეტული პასუხი არ გასცა:

"აღსანიშნავია ამომრჩევლის მაღალი აქტივობა, რომელიც ჩვენმა მოქალაქეებმა გამოიჩინეს, როგორც ქვეყნის მასშტაბით, ისე უცხოეთში გახსნილ უბნებზე. დიდი მადლობა ამომრჩეველს, რომელმაც ნდობა ქართულ ოცნებას გამოუცხადა. არჩევნების მაღალ, დემოკრატიულ სტანდარტებში ჩატარება არის ჩვენი სახელმწიფოს ფუნდამენტური ინტერესი და მთელი პასუხისმგებლობით ვაცხადებ, რომ გარკვეული პოლიტიკური ძალების უსუსური პროვოკაციული ქმედებები ქართველი ხალხის არჩევანს საფრთხეს ვერ შეუქმნის. მოგიწოდებთ, არ აყვეთ პროვოკაციებს, მშვიდ ვითარებაში დაველოდოთ შედეგებს".