ერთიანი ნაციონალური მოძრაობის წარმომადგენელი მივიდა მარნეულში იმ საარჩევნო უბანთან, სადაც ადამიანთა ჯგუფმა საარჩევნო უბანში შეჭრა სცადა. მან ხელისუფლებას მოუწოდა სიტუაციის დაწყნარებისკენ:

"ერთადერთი, რაც ჩვენ გვინდა, ეს უბანი გაუქმდეს. აქედან მე ვეუბნები ბატონ კვირიკაშვილს, რომელიც ჰპირდებოდა მშვიდ საარჩევნო გარემოს ამომრჩეველს. ბატონო კვირიკაშვილო, ან თქვენ უნდა მოხვიდეთ აქ და დაამშვიდოთ ეს ხალხი, ან ჩვენ შევდივართ შიგნით, უნდა გამოვიტანოთ ეს ყუთი გარეთ და გავხსნათ აქ, რომ გაბათილდეს".

იმამყულიევმა თქვა, რომ ის ხალხი, ვინ საარჩევნო უბანში შეჭრას ცდილობდა, მისი მხარდამჭერები არ არიან, არამედ არიან ის მარნეულელები, რომლებიც "მზად არიან დაიცვან საკუთარი ხმა".

მარნეულის სოფელ ყიზილაჯლოში სიტუაცია რამდენიმე საათია დაძაბულია, სადაც მოქალაქეთა ჯგუფს 48-ე საარჩევნო უბნის დარბევის მცდელობა ჰქონდა. ადგილზე მობილიზებულია პოლიცია.