ცენტრალური საარჩევნო კომისიის სპიკერმა ანა მიქელაძემ ბრიფინგზე ამ დროისთვის დაფიქსირებულ დარღვევებზე ისაუბრა.

მიქელაძის თქმით, რამდენიმე წუთის დაგვიანებით დაიწყო ხმის მიცემა რამდენიმე უბანზე:

"3 წუთის დაგვიანებით დაიწყო ხმის მიცემის პროცესი სამგორის 22-ე საარჩევნო უბანზე. 5 წუთით დაგვიანდა საარჩევნო უბნის გახსნა მთაწმინდის მე-6 საარჩევნო უბანზე, ასევე, ქუთაისის 27-ე უბანზე. აღნიშნული გამოწვეული იყო დამკვირვებლებისა და მედიაორგანიზაციების წარმომადგენლების სიმრავლის გამო, რომლებმაც ვერ მოასწრეს დროულად რეგისტრაციის გავლა".

ცესკოს ინფორმაციით, ფოთის 61-ე ოლქის მე-8 უბანში საუბნო საარჩევნო კომისიის წევრებმა ვერ მოახერხეს დროულად შესვლა შენობაში, სადაც მნიშვნელოვანი დოკუმენტაცია ინახებოდა. შენობის კარი ჩაიკეტა და საჭირო გახდა სამაშველოს გამოძახება. მიუხედავად ამისა, კომისიამ დროულად დაასრულა კენჭისყრისწინა პროცედურები და საარჩევნო უბანი დრულად გაიხსნა.

მიქელაძე აღნიშნავს, რომ ზუგდიდის მე -18 საარჩევნო უბანზე, დაახლოებით, 30-40 წუთით შეფერხდა ხმის მიცემის პროცესი. კომისიის წევრებმა კენჭისყრისწინა პროცედურების დროულად დასრულება ვერ მოახერხეს.

ცესკოს სპიკერმა არ უპასუხა ჟურნალისტის კითხვებს დიდუბის მე-18 უბანზე არჩევნების ჩაშლის მცდელობის დაფიქსირებასთან დაკავშირებით.