გიგა ბოკერია გივი თარგამაძის საქმესთან დაკავშირებით შსს-ს გამოძიებას ეხმაურება და აცხადებს, რომ დასკვნების გაკეთება ნაადრევია, თუმცა ესაა წინასაარჩევნო პიარი:

"იმ ინფორმაციაზე დაყრდნობით, რომელიც ახლა გვაქვს, დასკვნის გამოტანა შეუძლებელია, თუ არ ჩავთვლით იმას, რომ პროსამთავრობო ტელევიზიის ეგზოტიკური ჟურნალისტი დაჟინებით მოითხოვდა რესპონდენტებისგან ეთქვათ თითქოს ეჭვმიტანილი უკრაინიდანაა ან რაიმე კავშირი აქვს, თუმცა ამას არავინ ამბობდა.

ჩვენ კარგად გვახსოვს პრემიერის მიერ ჯერ კიდევ გამოძიების დაწყებამდე გაკეთებული აქცენტებიც.

ეს ყველაფერი კიდევ ერთხელ მიანიშნებს ძალიან უტიფარ წინასაარჩევნო პიართან გვაქვს საქმე. ეს ადასტურებს თუ როგორი უპასუხისმგებლო ხელისუფლება გვყავს, რომელსაც საბედნიეროდ ძალიან მალე დავასრულებთ".

გუშინ ღამით შინაგან საქმეთა მინისტრის მოადგილემ, ბესიკ ამირანაშვილმა, ტელეკომპანია იმედს განუცხადა, რომ სამართალდამცავებმა 3 დღიანი ოპერაციის შედეგ გახსნეს დეპუტატ გივი თარგამაძის ავტომობილის აფეთქების ფაქტი.

შსს–მ ასევე გამოაქვეყნა სათვალთვალო კამერიდან გადაღებული კადრები, რომლებშიც მათი თქმით ის პიროვნება ჩანს, ვინც თარგამაძის მანქანა ააფეთქა.