თბილისის მერი, კახა კალაძე ამბობს, რომ კომპანია MAN-ის 50 ერთეული ავტობუსი ივნისის ბოლოს ნაცვლად ქალაქში სექტემბრის ბოლოს შემოვა. კალაძე ამბობს, რომ კომპანიის მხრიდან დაგვიანებულ მომსახურებაზე მათთან "ძალიან ცუდი საუბარიც ჰქონდა" და ხელშეკრულებით გათვალისწინებულ ჯარიმებსაც გამოიყენებენ.

"კომპანიამ აიღო ვალდებულება, რომ 90 ერთეული ავტობუსი მოეწოდებინა ჩვენთვის ჯერ მაისის და მერე ივნისის თვეში, მაგრამ პრობლემები შეექმნათ. ყოველდღიური კომუნიკაცია გვაქვს და გვპირდებიან, რომ სექტემბრის ბოლოსთვის აუცილებლად იქნება მოწოდებული ის 50 ერთეული. გარდა ამისა, სექტემბერში 200 ცალი 8-მეტრიანი ავტობუსების ნაწილი უნდა შემოვიდეს. წლის ბოლოსთვის დამთავრებული იქნება მოწოდება".

40 ათმეტრიანი მწვანე ავტობუსი, რომელიც თბილისში 3 მაისს უნდა ჩამოეყვანათ ამ დრომდე არ არის. ხელშეკრულების მიხედვით, ჯარიმა ყოველ ვადაგადაცილებულ დღეზე შემოსაყვანი ავტობუსების ღირებულების 0,2 პროცენტია. 40 ავტობუსზე დღიურად ჯარიმა 40 ათასი ლარია. ამ დრომდე (74 დღე) ჯარიმის მოცულობა 2,96 მილიონი გახდა.