აშშ-ს პრეზიდენტმა, დონალდ ტრამპმა დანიაში ვიზიტი გააუქმა, რადგან პრემიერ-მინისტრმა, მეტე ფედერიქსენმა გრენლანდიის მიყიდვის განხილვაზე უარი განაცხადა.

"დანია განსაკუთრებული ქვეყანაა არაჩვეულებრივი ხალხით, მაგრამ პრემიერ-მინისტრის სიტყვებზე დაყრდნობით, რომ ის არ არის გრენლანდიის მიყიდვის განხილვით დაინტერესებული, ორ კვირაში დანიაში დაგეგმილი ჩემი ვიზიტი სხვა დროისთვის უნდა გადავდო", — დაწერა პრეზიდენტმა ტვიტერზე.

მედიაში რამდენიმე დღის წინ გავრცელდა ინფორმაცია, რომ დონალდ ტრამპს მსოფლიოს ყველაზე დიდი კუნძულის, გრენლანდიის ყიდვა სურდა. შემდგომში ეს ინფორმაცია თვითონ ტრამპმაც დაადასტურა.

გრენლანდია ჩრდილოეთ ყინულოვან და ატლანტის ოკეანეებს შორის, ჩრდილოეთ ამერიკის კონტინენტთან მდებარეობს. ყველაზე დიდი კუნძული ამჟამად დანიის დაქვემდებარებაშია და ფართო ავტონომიით სარგებლობს.

დონალდ ტრამპმა განაცხადა, რომ გრენლანდიის ყიდვა სტრატეგიული მიზნებისთვის იქნებოდა საინტერესო. ამ ინიციატივას უარყოფითად შეხვდა დანიის ხელისუფლება. პრემიერ-მინისტრმა, მეტე ფრედერიქსენმა განაცხადა, რომ გრენლანდია არ იყიდება და აშშ-სთვის მისი მიყიდვის იდეა აბსურდულია:

"გრენლანდია დანიის არ არის. გრენლანდია ეკუთვნის გრენლანდიას. იმედი მაქვს, რომ ეს სერიოზულად არ განიხილება".