საქართველოს პრემიერ-მინისტრი, მამუკა ბახტაძე აცხადებს, რომ სახელმწიფო შეასრულებს თავის ვალდებულებას "ანუ ღრმაწყლოვანი პორტი უნდა აშენდეს".

მისივე თქმით, მშენებელთან დაკავშირებით, რეგიონული განვითარებისა და ინფრასტრუქტურის სამინისტრო ელოდება კონსორციუმის პასუხს, ჩატარდა კონკურსიც, რომელში გამარჯვებულ კომპანიას ექნება ვალდებულება, ააშენოს პორტი იმ ვადებში, რომელიც აუცილებელია.

"ჩვენ მაქსიმალურ მხარდაჭერას გავაკეთებთ ანაკლიის კონსორციუმისადმი, რომ ეს პროექტი დასრულდეს წარმატებით. ამ პროექტის ასეთ სტატუსში ყოფნა სამუდამოდ ვერგაგრძელდება. ეს აზარალებს ქვეყანას, ვინაიდან ჩვენ გვჭირდება ღრმაწყლოვანი პორტი, მაგრამ ამავდროულად, სრული მხარდაჭერა გვაქვს გამოცხადებული ანაკლიის კონსორციუმის მიმართ და მაქვს იმედი, რომ კონსორციუმი შეძლებს ყველა იმ პირობის დაკმაყოფილებას, რომელიც საკუთარ თავზე აიღო", — აღნიშნა პრემიერმა.

ანაკლიის განვითარების კონსორციუმს სამშენებლო ნებართვით გათვალისწინებული დოკუმენტების წარმოდგენის ვადა 31 დეკემბრის ჩათვლით გაუხანგრძლივდა. გადაწყვეტილება საქართველოს ეკონომიკისა და მდგრადი განვითარების სამინისტროს სსიპ ტექნიკური და სამშენებლო ზედამხედველობის სააგენტომ შპს ანაკლიის განვითარების კონსორციუმის გენერალური დირექტორის, ლევან ახვლედიანის 16 ივლისის განცხადების საფუძველზე მიიღო.

მამუკა ხაზარაძემ და ბადრი ჯაფარიძემ ანაკლიის განვითარების კონსორციუმის სამეთვალყურეო საბჭოს თავმჯდომარისა და თავმჯდომარის მოადგილის პოსტები დატოვეს. ანაკლიის განვითარების კონსორციუმის გენერალურმა დირექტორმა, ლევან ახვლედიანმა, განაცხადა, რომ ხაზარაძემ და ჯაფარიძემ თანამდებობების დატოვებით, ანაკლიის განვითარების კონსორციუმი, მათ წინააღმდეგ მიმართული სასამართლო პროცესის შესაძლო უარყოფითი შედეგებისგან დაიცვეს.