"ქიბარ ხალვაშს შეუძლია გაყიდოს არხის წილები, მაგრამ ის ვერასოდეს ივაჭრებს რუსთავი 2-ის გუნდით", — ასე გამოეხმაურნენ არხის ჟურნალისტები ქიბარ ხალვაშის გადაწყვეტილებას ტელევიზიის გაყიდვასთან დაკავშირებით.

ჟურნალისტების პოზიციით, ისინი უკვე მრავალი წელია, ქვეყნის ყველაზე რეიტინგულ გადაცემებს ამზადებენ და ზუსტად 25 დღეა, ახალი მფლობელის პირობებშიც ისეთივე კრიტიკულები არიან, როგორც 18 ივლისამდე იყვნენ.

ისინი აცხადებენ, რომ არხის მფლობელის გადაწყვეტილება მოულოდნელი არ ყოფილა, თუმცა გუნდი ნებისმიერი მფლობელის პირობებში რუსთავი 2-დან გაქცევას არ აპირებს.

"რუსთავი 2-ს არ გააყიდვინებს ხელისუფლება ქიბარ ხალვაშს ისეთ ადამიანზე, რომელიც არ არის მჭიდრო კავშირში ხელისუფლებასთან. ამის შემდეგ მარტივია პროგნოზირება, ვის ხელში შეიძლება აღმოჩნდეს რუსთავი 2", — აცხადებს არხის საინფორმაციო სამსახურის უფროსი, ნოდარ მელაძე.

მისივე თქმით, ეს მოქმედებები აჩენს განცდას, რომ არსებობს კონკრეტულ გეგმა, რომელსაც მიჰყვებიან. ის არ გამორიცხავს, რომ რ2 შეიძლება არც გაიყიდოს.

"მაქვს ვარაუდი, რომ ექნებათ განცხადება, ვყიდდით რუსთავი 2-ს, ვერ გაიყიდა და შემდეგ ეს ყველაფერი აისახება სატელევიზიო ბადეზე", — ამბობს მელაძე.

კურიერის წამყვანი პაატა იაკობაშვილი ამბობს, რომ ივანიშვილი ჩქარობს, რადგან "ცხელ აგვისტოში უნდა, რომ მოაგვაროს ყველაფერი".

"ჩვენს გეგმებს არ შევცვლით და ვიბრძოლებთ სარედაქციო დამოუკიდებლობისთვის, ვინც არ უნდა იყოს მმართველი. თუმცა ვიცით, რომ ვინც არ უნდა იყოს, ივანიშვილისთვის ქიბარ ხალვაშზე სანდო იქნება. თვითონ არ გამოჩნდება. ეს იქნება მისთვის უფრო სანდო და მისაღები ადამიანი, რომელიც პირდაპირ გააკეთებს რ2-ში იმას, რაც სურს ივანიშვილს. სხვისი ხელით შეცვლის აქ მდგომარეობას", — განაცხადა პაატა იაკობაშვილმა.

ჟურნალისტ მიხეილ სესიაშვილისთვის კი გაუგებარია ფორმა, რომლითაც ხალვაში რუსთავი 2-ს ყიდის.

"როდესაც რაღაცას ყიდი, ცდილობ, რომ მაქსიმალური ფასი დაადო და რაც შეძლება მიმზიდველად წარმოაჩინო, რაც ქიბარის განცხადებებში ვერ დავინახეთ. პირიქით, ნეგატიურ კონტექსტში წარმოაჩენს და სურს, რომ მყიდველი დააფრთხოს", — ამბობს ის.

ტელეკომპანია რუსთავი 2-ის 100-პროცენტიანი წილის მფლობელი, ქიბარ ხალვაში ამბობს, რომ გადაწყვიტა, არხი გაყიდოს. მის განცხადებას რუსთავი 2 ავრცელებს.

არხის მფლობელი აღნიშნავს, რომ მხოლოდ იმ პირებთან ისაუბრებს, ვისაც საბანკო გარანტია ექნება ან საკონკურსო ანგარიშზე არანაკლებ მილიონ დოლარს განათავსებს. არხი გახდება მისი, ვინც ყველაზე მეტს გადაიხდის.

ქიბარ ხალვაშის მტკიცებით, ყველა სამართლებრივი საფუძველი არსებობის იმისათვის, რომ დაიწყოს კომპანიის გადახდისუუნარობის საქმის წარმოება. მისი განმარტებით, არხის დავალიანება 70 მილიონ ლარს უახლოვდება, საიდანაც 27 მილიონამდე საბიუჯეტო გადასახადია.