რუსთავი 2-ის 100%-იანი წილის მფლობელი, ქიბარ ხალვაში აცხადებს, რომ რუსთავი 2-ის დავალიანება 70 მილიონ ლარს უახლოვდება, საიდანაც მხოლოდ სახელმწიფო ბიუჯეტის მიმართ დავალიანება 27 მილიონ ლარს შეადგენს.

ქიბარ ხალვაშის თქმით, რუსთავი 2-მა ეს დავალიანება იმ დროიდან დააგროვა, როცა თავად რუსთავი 2-ისთვის დავა დაიწყო. ხალვაში ამ პროცესს ნიკა გვარამიას უკავშირდებს და "მძარცველად" მოიხსენიებს.

"მისი კრედიტორული დავალიანება 70 მილიონ ლარს უახლოვდება, საიდანაც მხოლოდ სახელმწიფო ბიუჯეტის მიმართ დავალიანება 27 მილიონ ლარს შეადგენს. რუსთავი 2-ს პრაქტიკულად ყველას ვალი აქვს — წყლის მომწოდებელი კომპანიიდან დაწყებული, ეგზიტპოლების ჩამტარებელი ამერიკული კომპანიით დამთავრებული. ვალის დიდი ნაწილი დაგროვილია ბოლო რამდენიმე წლის განმავლობაში, სწორედ, იმ პერიოდში, რაც დავა დავიწყე და ცხადია, რომ ყველაფერი მიზანმიმართულად ხდებოდა. აქვე ვიტყვი, რომ აბსურდულია საუბრები, თითქოს ჩვენ მიერ მოთხოვილ ყადაღას შეეძლო, კომპანია დაეზარალებინა. დღემდე ვერ ვნახე რომელიმე ექსპერტული დასაბუთება ან დასკვნა, რაც ამ ზარალს დაადასტურებდა", — ნათქვამია ქიბარ ხალვაშის განცხადებაში.

მისი თქმით, ამ დავალიანებისა და კრიტიკული ფინანსური მდგომარეობის გამო რუსთავი 2-ის გაყიდვას აპირებს. ის აცხადებს, რომ არხის გაყიდვასთან დაკავშირებით მხოლოდ მიხეილ სააკაშვილთან არ გამართავს მოლაპარაკებას, ყველა პოტენციურმა მყიდველმა კი სურვილის შესახებ საჯაროდ უნდა განაცხადოს.

19 ივლისს რუსთავი 2-მა ქიბარ ხალვაშისა და ვანო ჩხარტიშვილის კავშირზე სიუჟეტი მოამზადა. ტელევიზიის ცნობით, ხალვაში ჩხარტიშვილის უახლესი პარტნიორია.

"საჯარო რეესტრის მონაცემები ადასტურებს, რომ ჩხარტიშვილი-ხალვაშის ინტერესები ბევრ კომპანიაში იკვეთება. ხშირ შემთხვევებში მათი სახელები პირდაპირ არ ფიგურირებს, მაგრამ კომპანიები და დამფუძნებლები ერთი საერთო პიროვნებით არიან დაკავშირებული. დოკუმენტები ამტკიცებს, რომ ვანო ჩხარტიშვილის და ქიბარ ხალვაშის კომპანიების ნაწილი ერთი და იმავე ადამიანის მეშვეობით იმართება", — ნათქვამია რ2-ის სიუჟეტში.

რუსთავი 2-ის საქმე

ადამიანის უფლებათა ევროპულმა სასამართლომ რუსთავი 2-ის საქმეზე ევროპული კონვენციის არც ერთი მუხლის დარღვევა არ დაადგინა. ეს ნიშნავს, რომ ძალაში დარჩა საქართველოს უზენაესი სასამართლოს გადაწყვეტილება, რომლის მიხედვითაც არხი ქიბარ ხალვაშს ეკუთვნოდა. გარდა ამისა, სტრასბურგის სასამართლომ საქართველოს უზენაესი სასამართლოს გადაწყვეტილების აღსრულების შეჩერების დროებითი მექანიზმიც გააუქმა. სწორედ ამ მექანიზმის გამო ვერ გადაიფორმა 2017 წელს ქიბარ ხალვაშმა რუსთავი 2.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. 18 ივლისიდან რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა. რუსთავი 2-ის ჟურნალისტები აცხადებენ, რომ ქიბარ ხალვაში ხელისუფლების გეგმას ახორციელებს.