საქართველოს პრეზიდენტი სალომე ზურაბიშვილი ტვიტერზე ყოფილი პრეზიდენტის მიხეილ სააკაშვილის მიერ აგვისტოს ომთან დაკავშირებით მიცემულ ინტერვიუს გამოეხმაურა. ზურაბიშვილი წერს, რომ სააკაშვილის განცხადებები ამახინჯებს ისტორიას და შეურაცხმყოფელია ჩვენი მოკავშირე ერებისთვის და ლიდერებისთვის.

"გაპრეზიდენტების შემდეგ აღვნიშნე, რომ არასდროს გავაკეთებდი კომენტარს სააკაშვილის მოსაზრებებზე, მაშინაც კი, როცა ის პირადად იქნებოდა შეურაცხმყოფელი. მაგრამ, მისმა ბოლო ინტერვიუმ, 2008 წლის ომის დროს დასავლეთთან ურთიერთობის შესახებ, გადაკვეთა ყველა ზღვარი და ზიანს აყენებს საქართველოს სტრატეგიულ ინტერესებს. სააკაშვილის განცხადებები ამახინჯებს ისტორიას და შეურაცხმყოფელია ჩვენი მოკავშირე ერებისთვის და ლიდერებისთვის, რომლებიც საქართველოს გვერდით დგანან დამოუკიდებლობის მოპოვების დღიდან. ასეთი სიცრუე და არასწორი ინტერპრეტაცია არის უპასუხისმგებლო და მიუღებელი ყოფილი პრეზიდენტისგან", — წერს პრეზიდენტი.

მისი თქმით, ეს არის ნათელი მცდელობა საქართველოსა და მისი მოკავშირეების ურთიერთობისთვის ძირის გამოთხრის, ევროინტეგრაციის გზაზე.

"ქართველი ხალხის სახელით, კიდევ ერთხელ ვიმეორებ ჩემი ქვეყნის მადლიერებას ევროპელი და ამერიკელი მოკავშირეების განგრძობადი მხარდაჭერისადმი 2008 წლის ომის პერიოდში და მას შემდეგ. როგორც პრეზიდენტი, ვიბრძოლებ ყველა მსგავსი მცდელობის წინააღმდეგ, რომელიც ძირს გამოუთხრის ჩვენს სტრატეგიულ ურთიერთობებს", — დაწერა ზურაბიშვილმა.

ომისა და მშვიდობის გაშუქების ინსტიტუტისთვის მიცემულ ინტერვიუში მიხეილ სააკაშვილმა აგვისტოს ომზე ისაუბრა, სადაც გააკრიტიკა ევროპელი დიპლომატების ნაწილი და საკუთარ შეცდომებზეც ისაუბრა.