9 აგვისტოს ილიას სახელმწიფო უნივერსიტეტსა და პარლამენტის ეროვნულ ბიბლიოთეკას შორის მემორანდუმი გაფორმდა. მემორანდუმს ხელი უნივერსიტეტის რექტორმა, გიგა ზედანიამ და ეროვნული ბიბლიოთეკის დირექტორმა, გიორგი კეკელიძემ მოაწერეს.

შეთანხმება ილიას სახელმწიფო უნივერსიტეტის ახალ პროგრამას ეხება, რომლის ფარგლებშიც იგეგმება სპეციალურად შერჩეული მასალების, პრესისა და წიგნების ციფრულ ფორმატში გადატანა. მომავალში ეს მასალები ერთიან ბაზაში მოიყრის თავს. ეროვნული ბიბლიოთეკის დირექტორის, გიორგი კეკელიძის თქმით, თანამშრომლობა ასევე გულისხმობ მასალების გამოკვლევას და სამეცნიერო დამუშავებას.

"უფრო ფართო გეგმების მიმართულებით, ჩვენ გვინდა, რომ საერთოდ დიგიტალური პროგრამა გვქონდეს, ვგულისხმობ ციფრულ ფორმატს, ტექსტის ამომცნობს, სპეციალურ ლაბორატორიებს და დარწმუნებული ვარ, რომ ამ ყველაფერს ერთობლივად ძალიან ეფექტურად გავართმევთ თავს", — აღნიშნა გიორგი კეკელიძემ.

გიგა ზედანიამ აღნიშნა, რომ ახალი პროგრამისთვის მნიშვნელოვანი იყო ეროვნულ ბიბლიოთეკაში დაცულ დოკუმენტებსა და წიგნებზე ხელმისაწვდომობა.

"ვაპირებთ, რომ ეს თანამშრომლობა განვავრცოთ და ძალიან საინტერესო გეგმები გვაქვს. უნივერსიტეტი ძალიან დაინტერესებულია იმ მიმართულებით, რომელსაც ჰქვია დიჯიტალური ჰუმანიტარული მეცნიერებები, რაც გულისხმობს ტექნოლოგიების გამოყენებას ცოტა მოულოდნელი კუთხით. დარწმუნებულები ვართ, რომ ეს თანამშრომლობა ბევრ საინტერესო რამეს მოიტანს, ჩვენი საკუთარი ისტორიის შესწავლის საქმეში", — თქვა გიგა ზედანიამ.