საქართველოს რკინიგზას არ სჯერა, რომ მისი თანამშრომლები, რომლებიც ხელფასის გაზრდას ითხოვენ, გაიფიცებიან. ამის შესახებ კომპანიისგან On.ge-სთვის მიწერილი პასუხიდან ირკვევა.

საქართველოს რკინიგზა აღნიშნავს, რომ არც დიდ და არც მცირემასშტაბიან გაფიცვას არ ელოდებიან.

"იმ ფონზე, როდესაც წლების განმავლობაში არ მომხდარა ხელფასების მატება და ეს ხდება ახლა იმ ფინანსური რესურსის ფარგლებში, რაც კომპანიას გააჩნია, გაფიცვა ყოველგვარ გონივრულობას არის მოკლებული... საქართველოს რკინიგზა ყოველგვარი შეფერხების გარეშე მუშაობს და იმუშავებს, მსგავსი განცხადებების გაკეთება არის მორიგი პროვოკაცია და დესტაბილიზაციისდანერგვის მცდელობა", — განმარტეს კომპანიაში.

მაშინ, როცა კომპანია შეზღუდულ ფინანსურ რესურსზე საუბრობს, სხვადასხვა მედიასაშუალებაში ტვირთბრუნვიდან მიღებული შემოსავლების 32,7 მილიონი ლარით გაზრდაზე ფასიან მასალებს უკვეთავს.

საქართველოს რკინიგზაში დასაქმებულები ხელფასების გაზრდის მოთხოვნით მასშტაბურ გაფიცვას გეგმავენ. ამის შესახებ რკინიგზელთა ახალი პროფკავშირებმა გაავრცელა ინფორმაცია. გაფიცვის დაწყების ზუსტი თარიღი ცნობილი 10 აგვისტოს გახდება. რკინიგზელები ხელფასების 50 პროცენტით მომატებას ითხოვენ.