საქართველოს პრეზიდენტმა გიორგი მარგველაშვილმა, დღეს, 5 ოქტომბერს, კლინიკაში დეპუტატ გივი თარგამაძის მანქანის აფეთქებისას დაზარალებული მოქალაქეები ლალი კიკნაძე და დავით კუხალაშვილი მოინახულა:

"ბოდიში მოვუხადე დაზარალებულებს, რომ ვერ შევძელით მათი ჯანმრთელობის დაზიანებისგან დაცვა. მადლობა გადავუხადე პერსონალს, რომ ასე ყურადღებით მკურნალობენ დაშავებულებს".

პრეზიდენტმა მიმართა სამართალდამცავებს, რომ ამ ვითარებაში გაორმაგებული მუშაობაა საჭირო კრიმინალის წინააღმდეგ:

"ამ დაძაბულ ვითარებაში, განსაკუთრებულად აქტიურად, გაორმაგებული მუშაობა გვმართებს ყველას იმისათვის, რომ უზრუნველვყოთ საზოგადოების დაცვა იმ კრიმინალებისაგან, ვინც მოქალაქეებს, ქალაქის ცენტრში აფეთქებს და რის შედეგადაც, ადამიანები, რომელთაც საერთოდ არავითარი კავშირი არ აქვს პოლიტიკასთან, დღეს საავადმყოფოში არიან მძიმე ჭრილობებით. მათი დაცვა ჩვენი ვალია, როგორც სახელმწიფოსი".

4 ოქტომბერს, საღამოს, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. შემთხვევის შედეგად დაშავდა 5 ადამიანი, მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.