პატრიოტთა ალიანსი ბათუმში აქციას მართავს, სადაც ისევ პრორუსული, ანტიდასავლური, ანტითურქული და ჰომოფობიური განცხადებები ისმის. პარტიის ლიდერები დავით თარხან-მოურავი და ირმა ინაშვილი მოსკოვთან საუბრის აუცილებლობაზე ამახვილებენ ყურადღებას.

პატრიოტთა ალიანსი აკრიტიკებს ანტიოკუპაციურ გზავნილებს და ამბობს, რომ რუსი ტურისტების წასვლა ქართულ ეკონომიკას აზარალებს. ამავდროულად, ისინი აკრიტიკებენ თურქი ტურისტების სიმრავლეს ბათუმში.

დავით-თარხან მოურავმა კიდევ ერთხელ უსაფუძვლოდ დაადანაშაულა თურქეთი ქართული მიწების ოკუპაციაში. თუმცა მანვე აღნიშნა, რომ მტრობა არავისთან უნდათ არც თურქეთთან და არც ევროპასთან, განსაკუთრებით კი რუსეთთან.

"დააკვირდით ტერმინებს: ეს ოკუპანტია, მტერი. ვერ ხვდებით, რომ მტრობისკენ და ომისკენ მიდის საქმე? ჩვენ არ გვინდა მტრობა და ომი, არც რუსეთთან", — განაცხადა თარხან-მოურავმა.

მანვე გააჯღერა, რომ ქართული პოლიტიკური ელიტა სხვა ქვეყნის ინტერესებს იცავს ქართულის ნაცვლად. თარხან-მოურავმა აღნიშნა, რომ "ბრიუსელის და ვაშინგტონის ინტერესების დაცვის ნაცვლად, ახლა ქართული ინტერესის დაცვის დროა".

გარდა ამისა სიტყვით გამომსვლელები სხვადასხვა ჰომოფობიურ მოწოდებებს ავრცეელბენ და ხაზს უსვამენ იმას, რომ პატრიოტთა ალიანსი არის პარტია, რომელმაც უარი უთხრა ლგბტ თემს.