თიბისის ბანკის დამფუძნებლის, ბადრი ჯაფარიძის თქმით, სამეურვეო საბჭოდან მისი და მამუკა ხაზარაძის გადადგომის მიუხედავად, ქართული კომპანიების აქციები ვარდნას განაგრძობს. ამის შესახებ მან სასამართლოში მისვლისას განაცხადა. დღეს, 26 ივლისს თბილისის საქალაქო სასამართლო ბადრი ჯაფარიძისა და მამუკა ხაზარაძის აღკვეთ ღონისძიებას განიხილავს.

როგორც ჯაფარიძემ ჟურნალისტებს უთხრა, ისინი არ ეთანხმებიან გირაოს ოდენობას, რადგან საუბარია 11 წლის წინანდელ ტრანზაქციასთან, "რომელსაც ფულის გათეთრებასთან კავშირი არ აქვს".

"ჩვენი მიზანია, რომ ამ პროცესში საზოგადოება იყოს სრულად ჩართული. ჩვენ ვსაუბრობთ ჩვენი ქვეყნის მომავალზე. ეს არ არის მხოლოდ ჩემი და მამუკას სახელის დაცვა, საუბარია ქვეყნის მომავალის დაცვაზე. მზად ვართ, დავიცვათ ეს მომავალი... საუბარია იმაზე, რომ ის ადამიანები, რომლებიც წარმოადგენენ ამ ქვეყანაში წარმატების სიმბოლოს, მათზე ხორციელდება თავდასხმა", — აღნიშნა ჯაფარიძემ.

ბიზნესმენის თქმით, ის და ხაზარაძე გაემიჯნებიან იმ პროექტებს, რომლებშიც წამყვან როლებს ასრულებენ.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.

თიბისი გრუპის 97%-მა ხაზარაძე და ჯაფარიძე ხელახლა აირჩია თავმჯდომარედ და მოადგილედ.

28 ივნისს გავრცელდა ინფორმაცია, რომ თიბისი ბანკის დამფუძნებლები მამუკა ხაზარაძე და ბადრი ჯაფარიძე თიბისის აქციების დაახლოებით 8%-ს დროებით გასხვისებას აპირებენ.

9 ივლისს მამუკა ხაზარაძემ განაცხადა, რომ აფუძნებს საზოგადოებრივ მოძრაობას. ხაზარაძის ინფორმაციით, მეგობრებთან და თანამოაზრეებთან, სხვადასხვა სფეროს პროფესიონალებთან ერთად სექტემბერში დააფუძნებს და მთავარი მიზანი ქვეყნის გაერთიანება და მისი დამოუკიდებლობის და თავისუფლების შენარჩუნება იქნება.

რამდენიმე კვირაში პროკურატურამ ბადრი ჯაფარიძესა და მამუკა ხაზარაძეს ფულის გათეთრების საქმეზე ბრალი წარუდგინა.