ოპოზიციონერი და კორუფციასთან ბრძოლის ფონდის წევრი, ლუბოვ სობოლი პოლიციამ მოსკოვის საარჩევნო კომისიიდან დივანზე წამოწოლილი გამოიყვანა. შემთხვევა 25 ივლისს მოხდა.

სობოლს მოსკოვის საკრებულოს არჩევნებში რეგისტრაციაზე უარი უთხრეს. მან საარჩევნო კომისიის შენობაში შიმშილობა დაიწყო და არჩევნებისთვის რეგისტრაციას ითხოვდა.

შენობიდან გამოყვანის შემდეგ ოპოზიციონერი პოლიციამ განყოფილებაში გადაიყვანა. რის საფუძველზე სობოლი უცნობია. რამდენიმე საათში ის გაათავისუფლეს და დაკითხვაზე დაიბარეს.

მოსკოვის საარჩევნო კომისიამ საკრებულოს არჩევნებისთვის ოპოზიციონერი დეპუტატების დიდი ნაწილი არ დაარეგისტრირა, მათ შორის კორუფციასთან ბრძოლის ფონდის დირექტორი ივან ჟდანოვი, სახელმწიფო დუმის ყოფილი დეპუტატი დმიტრი გუდკოვი და ილია იაშინი.

წინა კვირას კომისიამ ოპოზიციონერების მიერ შეგროვებული ხელმოწერები დაბლოკა და განმარტა, რომ მათი დიდი ნაწილი არარსებულ და გარდაცვლილ ადამიანებს ეკუთვნით. თვითონ ოპოზიციონერები აცხადებენ, რომ შესაძლოა, შემმოწმებლებმა არარეალური ხელმოწერები თვითონ ჩაამატეს. ისინი მიიჩნევენ, რომ არჩევნებზე მათი არდაშვება უკანონოა.

არჩევნებში დაბლოკვის გამო ოპოზიციის წევრებმა საპროტესტო აქციების გამართვა დაიწყეს, რომლის კულმინაცია 20 ივლისს გამართული მრავალათასიანი აქცია გახდა. ამასთანავე, 24 ივლისს საგამოძიებო კომიტეტმა მიტინგების გამო საარჩევნო კომისიის მუშაობაში ხელშეშლისთვის გამოძიება დაიწყო. იმავე საღამოს ოპოზიციონერების სახლებში პოლიციამ ჩხრეკები ჩაატარა და დაკითხვაზე დაიბარა.