გორში Fashion week-ის დასკვნით ღონისძიებაზე ერთმანეთს ჟურნალისტი, ნინო ადამაშვილი და დიზაინერი, გიორგი მასხულია დაუპირისპირდნენ. ინფორმაციას ადგილობრივი სააგენტო qartli.ge ავრცელებს.

მათი ცნობით, ადამაშვილი ამტკიცებს, რომ მასხულიამ ის თმით ითრია, რის გამოც პოლიცია გამოიძახა. მასხულია ბრალდებას უარყოფს და ამბობს, რომ დასკვნითი ღონისძიების ჩაშლაში ადამაშვილს წვლილი მიუძღვის.

შინაგან საქმეთა სამინისტროში On.ge-ს უთხრეს, რომ მომხდარზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს. უწყებაში ამბობენ, რომ ინციდენტში მონაწილე ორივე პირი პოლიციაში გამოკითხვაზე გადაიყვანეს.

გამოცემის ცნობით, თავდაპირველად პოლიცია რესტორან მზიურში გამოიძახეს. ორგანიზატორები შენობიდან პოსტ-TV-ის გადამღები ჯგუფის გაყვანას ითხოვდნენ. ამ დროს ღონისძიების ერთ-ერთი ორგანიზატორი, სოსო კავკავაშვილი შეუძლოდ გახდა. ორგანიზატორი, ინგა სიორიძე საღამოს ჩაშლაში პოსტ-TV-ის ადანაშაულებს და ამბობს, რომ შესაძლოა, ფაქტს სამართლებრივი რეაგირება მოჰყვეს.

გორში რეგიონ ფეშენ ვიკი სამი დღის განმავლობაში მიმდინარეობდა. ფესტივალი გუშინ, 22 ივლისს უნდა დასრულებულიყო, თუმცა, დასკვნითი ღონისძიების დაწყებამდე ფეშენ ვიკის ბანერის გადატანის დროს მუშა დაშავდა. ამ ინციდენტის გამო, მერიამ ორგანიზატორებს ურჩია, კულტურისა და დასვენების პარკში დაგეგმილი ღონისძიება გადაედოთ, თუმცა, მათ გადადებას რესტორან მზიურში გამართვა არჩიეს რადგან, მათივე თქმით, ღონისძიებას სხვადასხვა ქვეყნებიდან ჩამოსული სტუმრები ესწრებოდნენ.