გორის მაჟორიტარი დეპუტატობის კანდიდატი ირაკლი ოქრუაშვილი გუშინ მის მიმართ სროლის ფაქტზე კიდევ ერთ განცხადებას აკეთებს და ქართული ოცნების აღმასრულებელი მდივნის ირაკლი კობახიძის განცხადებას ეხმაურება:

"კობახიძემ არაფერი იცოდა ნახევარი საათით ადრე რა განცხადებას გავაკეთებდი. მან წინასწარვე დააანონსა, რომ მე ამას პოლიტიკურ სარჩულს დავუდებდი და ცოტა ეჭვის შემქმნელია მისი ასეთი ვარაუდები. არ უნდა ვიმკითხაოთ და მითქმა-მოთქმას არ უდნა ავყვეთ, ეს ერთი. მეორე, მისი ეს განცხადება იყო საკმაოდ ცინიკური, საკმაოდ უპასუხისმგებლო, არასახელმწიფოებრივი, იმ დროს, როდესაც ორი ადამიანი იყო დაჭრილი მათი აქტივისტების მონაწილეობით, ინსპირირებით, მათი აქტივისტების მიერ ამ კრიმინალების შეგულიანებით

პოლიციისთვის წამზომი ჩართულია, მე არ ვაპირებ ამ წამზომის არც სწრაფ რეჟიმში გადაყვანას, მაგრამ მათ დრო ეწურებათ საარჩევნო დღეს. თუ 8 ოქტომბერს ეს ადამიანი არ იქნება დაკავებული, ეს იქნება მკაფიო გზავნილი ამ კატეგორიის სხვა ადამიანების მიმართ, რომლებიც ჩართულები არიან საარჩევნო პროცესში ქართული ოცნების მხრიდან, რომ "ნუ გეშინიათ ბიჭებო ყველაფერი კარგად იქნება". მაგრამ, თუ ეს ყველაფერი მათთვის კარგად იქნება, მე შეიძლება ვიმოქმედო ჩემი წესებით, ჩემი რესურსებით მათ წინააღმდეგ".

ირაკლი ოქრუაშვილმა რუსთავი 2-თან საუბრისას განაცხადა, რომ ინციდენტში ქართული ოცნების აქტივისტები მონაწილეობდნენ:

"ბუნებრივია, რომ ეს ყველაფერი დაბრალდა ქართულ ოცნებას და არა სხვა რომელიმე პოლიტიკურ პარტიას".

კობახიძემ ოქრუაშვილის მიმართ სროლის ფაქტს "ჩვეულებრივი შელაპარაკება" უწოდა და დასძინა, რომ ამას პოლიტიკური მოტივი არ ჰქონია.

გუშინ გორის მაჟორიტარი დეპუტატობის კანდიდატს, ირაკლი ოქრუაშვილს, გორში, რკინიგზის სადგურის დასახლებაში იმ დროს ესროლეს, როდესაც ამომრჩეველს ხვდებოდა.