შინაგან საქმეთა სამინისტრომ 20-21 ივნისის აქციის საქმეზე კიდევ ოთხი პირი ჯგუფური ძალადობის ბრალდებით დააკავა. ამის შესახებ უწყებაში ბრიფინგი რამდენიმე წუთის წინ გაიმართა.

უწყების ინფორმაციით, 20-21 ივნისს, პარლამენტის მიმდებარე ტერიტორიაზე განვითარებული მოვლენებისას დაკავებულები მონაწილეობდნენ ჯგუფურ ძალადობაში, სხვადასხვა საგნის გამოყენებით ახორციელებდნენ პოლიციელებზე თავდასხმას და უწევდნენ მათ წინააღმდეგობას, ასევე, ორგანიზებულად შტურმით ცდილობდნენ პარლამენტის შენობაში შეჭრას.

"1992 წელს დაბადებული პირი პოლიციელების მიმართ გამოირჩეოდა განსაკუთრებული აგრესიით და ცდილობდა მათთვის ფარის წართმევას. ასევე, მან ერთ-ერთი სამართალდამცავი კორდონიდან ხალხის მასაში გაათრია. 1979 წელს დაბადებული პირი ფიზიკურად და სიტყვიერად უპირისპირდებოდა სამართალდამცავებს და აგრესიულად ცდილობდა პარლამენტის ტერიტორიაზე შეჭრას. მან სოციალურ ქსელში განათავსა 20 ივნისს, პარლამენტის შენობასთან გადაღებული ვიდეო, სადაც ხალხს საგნების სროლით პოლიციის კორდონზე შტურმისკენ მოუწოდებს და სამართალდამცავებს აყენებს სიტყვიერ შეურაცხყოფას. 1996 წელს დაბადებული სამართალდამცველს ურტყამდა რეზინის ხელკეტს და შეკრებილებს მოუწოდებდა პოლიციელებზე თავდასხმისკენ. რაც შეეხება, 1997 წელს დაბადებულს, იგი მოქმედებდა განსაკუთრებული აგრესიით, პოლიციელებს ართმევდა დამცავ ფარებს და ფიზიკურ შეტევას ახორციელებდა მათზე", — აღნიშნავენ უწყებაში.

შინაგან საქმეთა სამინისტრომ 20-21 ივნისის აქციის საქმეზე ჯგუფური ძალადობის ბრალდებით ოთხი პირი 4 ივლისსაც დააკავა. უწყების ცნობით, პასუხისგებაშია მიცემული 9 პირი, მათ შორის პარლამენტის წევრი, ნიკა მელია.

ძალადობრივი ჯგუფის ორგანიზების ბრალდებით საქართველოს პროკურატურა ნაციონალური მოძრაობის წევრის, ნიკა მელიას დაპატიმრებასაც გეგმავდა. ნებართვის მისაღებად საგამოძიებო უწყებამ პარლამენტს მიმართა, დეპუტატებმა კი კოლეგას იმუნიტეტი შეუჩერეს. სასამართლომ დაპატიმრების უფლება არ გასცა, თუმცა მელიას გასაკონტროლებლად სამაჯური დაუყენეს და საჯარო განცხადებები აუკრძალეს.