ხაშურის საკრებულოში პატრიოტთა ალიანსის დეპუტატი, ალექსანდრე სიმონიშვილი, რომელმაც ჟურნალისტი ინგა გრიგოლია შეურაცხმყოფელი და დამამცირებელი ტერმინოლოგიით მოიხსენია, პარტიიდან გარიცხეს. ამის შესახებ ირმა ინაშვილმა ჟურნალისტ, ინგა გრიგოლიას ფეისბუქგვერდზე დაწერა.

"ვინაიდან ბატონ ალექსანდრეს ვესაუბრეთ და მან კარგად იცის ჩვენი პოზიციის შესახებ, შემიძლია უკვე საჯაროდ დავწერო პარტიის გადაწყვეტილების თაობაზე. ასეთ ვითარებაში, როგორც წესი, საჭიროა ბოდიშის მოხდა, როცა საქმე ეხება პირად შეურაცხყოფას. ვინაიდან ბატონ ალექსანდრეს შექმნილ ვითარებაზე მისი სუბიექტური წარმოდგენა აქვს და ეს წარმოდგენა ეწინააღმდეგება პარტიის პოზიციას და ჩემი, როგორც ქალი პოლიტიკოსის პოზიციას, მივიღეთ გადაწყვეტილება, ბატონმა ალექსანდრემ დატოვოს პარტია და თავისუფალი მოქალაქის რანგში გააგრძელოს კომენტირება. პარასკვეს შეიკრიბება პარტიის პოლიტსაბჭო და ამ გადაწყვეტილებას ოფიციალური ფორმა მიეცემა. გმადლობთ", — დაწერა ინაშვილმა.

ფოტო: სქრინი ინგა გრიგოლიას ფეისბუქიდან

TV პირველის ეთერში გადაცემა რეაქციის გასვლის შემდეგ რუსთავის საკრებულოს თავმჯდომარემაც, ლევან ონიანმა "ინგაზე" სექსისტური, დამამცირებელი და შეურაცხმყოფელი კომენტარი დაწერა. მისი თქმით, ეს კომენტარი სხვა ინგას მისამართით იყო. ონიანმა გუშინ, 14 ივლისს ბოდიში მოიხადა.