ერთიანი ნაციონალური მოძრაობის წარმომადგენელი, გიგა ბოკერია ჟურნალისტ შალვა რამიშვილისა და ქართული ოცნების აღმასრულებელი მდივნის, ირაკლი კობახიძის მიერ გაკეთებულ განცხადებას ეხმაურება და განმარტავს, რომ მათი ბრალდებები წინასაარჩევნო სანახაობის ნაწილია:

"ასეთ კლოუნადაზე სერიოზულ კომენტარს ვერც გავაკეთებ, 8 ოქტომბერს არის არჩევნები, რომელზეც ქართველი ხალხი იმ ვითარებიდან გამომდინარე, რაც ქვეყანაში არის შექმნილი, იქიდან გამომდინარე, რაც ივანიშვილმა გააკეთა, როგორც დააწიოკა ქვეყანა და გადააგდო ხალხი და იქიდან გამომდინარე, რა მკაფიო და ნათელი გეგმა აქვს ნაციონალურ მოძრაობას, გააკეთებს არჩევანს. ეს რბილად რომ ვთქვათ, გაუგებრობა მშვიდობიანი არჩევნების გზით დასრულდება".

დღეს შალვა რამიშვილმა და თავისუფალი ზონის ყოფილმა წევრმა, ბესო კალაძემ საგანგებო ბრიფინგი გამართეს, რომელზეც განმარტეს, რომ რუსთავი 2 საზოგადოებრივი აზრის გამოკითხვის გაყალბებულ შედეგებს ასაჯაროვებს.

აღნიშნულ აზრს იზიარებს ქართული ოცნების აღმასრულებელი მდივანი, ირაკლი კობახიძეც, რომელიც რუსთავი 2-ს ბიძინა ივანიშვილის სიტყვების გაყალბებაშიც ადანაშაულებს.