კოსმოსში მოდრეიფე კომეტის 12 წლიანი დევნისა და შესწავლის შემდეგ, ევროპის კოსმოსური სააგენტოს ზონდმა, სახელად როზეტამ, კომეტის ყინულოვან ზედაპირზე გეგმიური დაჯახებით თვითლიკვიდაცია მოახდინა.

როგორც ევროპის კოსმოსური სააგენტოს მისიების მართვის ცენტრმა განაცხადა, მათი კავშირი ზონდთან ამ პარასკევს, დილის 6:39-ზე, მას მერე შეწყდა, რაც საკვლევი ხომალდი კომეტა 67P/Churyumov-Gerasimenko-ს ზედაპირზე აფეთქდა.

ESA-ს (European Space Agency) ხელმძღვანელის, იან ვოერნერის აზრით, როზეტას მისია წარმატებულია, რადგან ამ ზონდმა თავისი 12 წლიანი მისიის მანძილზე კომეტებზე უამრავი ინფორმაცია მოგვაწოდა, რომლის გაანალიზებას მეცნიერების რამდენიმეწლიანი შრომა დასჭირდება. როზეტას ზონდი იმითაცაა უნიკალური, რომ მან, პირველმა ისტორიაში, მოახერხა კომეტაზე დაჯდომა. იმ კომეტაზე, რომელიც მისივე სასაფლაო გახდა (67P).

როზეტას ზონდს სხვა ზონდებისგან ის განასხვავებდა, რომ მას შეეძლო ერთ ობიექტზე ხანგრძლივი დაკვირვება. მაგალითისთვის, Deep Impact-ის მიერ 2005 წელს კომეტა Tempel 1-ისკენ გასროლილი ზონდი თავის საკვლევ ობიექტს მხოლოდ 15 წუთის მანძილზე სწავლობდა, მაშინ, როდესაც როზეტამ 67P-ს გარშემო ორბიტაზე დაკვირვების 786 დღე გაატარა და აღწერა მისი ცვლილების რამდენიმე სეზონი კომეტის მზესთან მიახლოებისას და დაშორებისას.

როზეტას მიერ მოპოვებულმა ფაქტებმა ბევრი დომინანტური სამეცნიერო თეორია დააყენა ეჭვქვეშ - მაგალითად, ის, თუ როგორ გაჩნდა დედამიწაზე წყალი, ან სად და როგორ უნდა ვეძებოთ არამიწიერი სიცოცხლე.

ამ დროის მანძილზე, კომეტა ისე დაშორდა მზეს, რომ ზონდის მზის პანელები უკან დასაბრუნებელ ენერგიას ვეღარ აგროვებდნენ და მკვლევარებმა გადაწყვიტეს, რომ ზონდი კომეტის ზედაპირზე ჩამოეგდოთ.

ხუთშაბათს როზეტამ უკანასკნელი დირექტივა მიიღო, ბოლო ინფორმაცია მოაგროვა და 4 კილომეტრის დიამეტრის მქონე კომეტისკენ სასიკვდილო აჩქარება დაიწყო. დედამიწიდან დიდი მანძილით დაშორების გამო (720 მილიონი კილომეტრი), როზეტას სიკვდილის სიგნალი 40 წუთის დაგვიანებით მოვიდა.

კომეტის ზედაპირზე დაცემის დაბალი სიჩქარის გამო (წამში 90 სმ, ადამიანის სეირნობის სიჩქარე), აპარატმა მოახერხა აქამდე არნახულად ახლოდან გადაეღო კომეტის ზედაპირი. ეს მისგან ბოლო საჩუქარი იყო.

ფოტო: ESA

როზეტა კიდევ ერთ პატარა სიურპრიზს ინახავს - მის ზედაპირზე ლითონის ფირფიტაა დამაგრებული, რომელზეც ათასამდე სხვადასხვა ენაზე დაწერილი ტექსტია - საჩუქარი ნებისმიერისთვის, ვინც მას ოდესმე იპოვის.