მაშინ, როცა პარლამენტთან შეკრებილი ადამიანები მეხუთე დღეა შინაგან საქმეთა მინისტრის თანამდებობიდან გადაყენებას მოითხოვენ, მმართველი პარტიის პოლიტიკური მდივანი, ირაკლი ღარიბაშვილი ამბობს, რომ გიორგი გახარიას გუნდი მხარს უჭერს. ამის შესახებ მან TV პირველთან სტუმრობის დროს განაცხადა.

ჟურნალისტის კითხვაზე, გიორგი გახარიას პასუხისმგებლობის საკითხს გუნდი განიხილავს თუ არა, პარტიის პოლიტიკურმა მდივანმა ასე უპასუხა:

"მე გიდასტურებთ, რომ გუნდი მხარს უჭერს ბატონ გახარიას. გიორგის აქვს სრული მხარდაჭერა ამ პროცესებში".

თბილისში, პარლამენტში 20 ივნისს აქცია გაიმართა. სამართალდამცავებთან დაპირისპირების შემდეგ შინაგან საქმეთა სამინისტროს თანამშრომლებმა აქციის ძალის გადამეტებით დაშლა დაიწყეს, დაშავდნენ მოქალაქეები და ჟურნალისტები. მათ სპეცრაზმის თანამშრომლები დამიზნებით ესროდნენ. ამ დღიდან ამ დრომდე თბილისში იმავე ადგილზე აქციები იმართება და გაჩნდა მოთხოვნა მინისტრის, გიორგი გახარიას გადადგომის შესახებ.