ნაციონალური მოძრაობის ლიდერმა გრიგოლ ვაშაძემ განაცხადა, რომ ახლანდელ და წინა ხელისუფლების ქმედებებს თუ შევადარებთ, "უზარმაზარი განსხვავების დანახვა შეიძლება სისასტიკეში". რუსულ გამოცემა კომერსანტთან ინტერვიუში მან განაცხადა, რომ წინა მთავრობის დროს დემონსტრანტებს თავში პლასტმასის და რეზინის ტყვიებს არ ესროდნენ.

"არავინ არ წამლავდა მათ გაზით ისე როგორც ახლა. მთელი ღამე გული მერეოდა. ბრძოლის ველიდან ახალგაზრდა გოგო ბიჭების გამოყვანა მიწევდა. ზოგიერთს ხუთჯერ ექვსჯერ შვიდჯერ მოხდა ტყვია. ჩვენი კანონმდებლობით, დემონსტრანტების წინააღმდეგ სპეცსაშუალებების გამოყენება არ შეიძლება იქამდე, სანამ მოქალაქეებს სამჯერ არ გააფრთხილებენ. ჩვენ პირველები ვიყავით, რომელთაც სახეში პირველად შეასხეს ეს გაზი", — ამბობს ვაშაძე კომერსანტთან ინტერვიუში.

2019 წლის 20 ივნისი

მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.

სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ, რომელიც, მისი დის თქმით, უბრალო გამვლელი იყო და აქციაში არ მონაწილეობდა. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი. ამ დროისთვის კლინიკებში მკურნალობას 54 პირი აგრძელებს.

2007 წლის 7 ნოემბერი

პოლიციამ ცრემლსადენი გაზის, ხელკეტებისა და რეზინის ტყვიების გამოყენებით დაშალა რუსთაველის გამზირზე პარლამენტის შენობის წინ შეკრებილი ადამიანები. მაშნდელმა პრემიერ-მინისტრმა ზურაბ ნოღაიდელმა განაცხადა, რომ პოლიციამ შესაბამისი ზომები მიიღო, რათა რუსთაველის გამზირი მომიტინგეებისაგან გათავისუფლებულიყო.

"ძალის გამოყენებით გადაიკეტა რუსთაველის ქუჩა, შესაბამისად იქნა მიღებული შესაბამისი ზომები რუსთაველის ქუჩის გასახსნელად", — განაცხადა ზურაბ ნოღაიდელმა:

"გამოყენებული იქნა წყლის ჭავლი, დასავლური ცრემლსადენი გაზი, რომელი გამოიყენება ხოლმე მშვიდობიანი დემონტრაციების დასაშლელად, ის რაც მოხდა დღეს".

მოგვიანებით პოლიცია და სპეცდანიშნულების რაზმი იმედის ოფისშიც შეიჭრა და ტელეკომპანიამ მაუწყებლობა შეწყვიტა. პრეზიდენტმა მიხეილ სააკაშვილმა ქვეყანაში ვადამდელი არჩევნები გამოაცხადა, რომელიც 2008 წლის იანვარში ჩატარდა. არჩევნებში ისევ სააკაშვილმა გაიმარჯვა.