საპარლამენტო უმრავლესობის წევრი, კახა ოქრიაშვილი ამბობს, რომ დავით სერგეენკო დიდი ხანია მინისტრია და დროა, ახლა ვინმე სხვას დაუთმოს. ამის შესახებ მან სერგეენკოს გადადგომაზე გავრცელებულ ინფორმაციასთან დაკავშირებით რუსთავი 2-ს განუცხადა.

"მინისტრობა შთამომავლობით ხომ არ გადაიცემა?! ერთი ექვსი წელია კაცი მინისტრია. დავით სერგეენკოს აქვს მიღწევები, აქვს ჩავარდნები. დროა, ახლა დაუთმოს ვინმე ახალს", — თქვა ოქრიაშვილმა.

მისივე თქმით, ალბათ გამოქვეყნდება, რატომ მიდის ან რატომ უშვებენ და დეტალებზე მერე ისაუბრეს.

დავით სერგეენკოს გადადგომის შესახებ ინფორმაცია მედიით გავრცელდა. მთავრობის სხდომის დაწყებამდე დღეს, 17 ივნისს პრემიერმა, მამუკა ბახტაძემ თქვა, რომ "მოვლენებს წინ ნუ გავუსწრებთ". თავად სერგეენკომ განაცხადა, რომ "ვერ გამორიცხავს".