საქართველოს ეკონომიკის მინისტრი, ნათია თურნავა ამბობს, რომ ანაკლიის ღრმაწყლოვანი პორტის აშენება მთავრობის პრიორიტეტია. ამის შესახებ მინისტრმა პარლამენტში სიტყვით გამოსვლის დროს განაცხადა.

"ანაკლია არის ჩვენი პრიორიტეტი, არც ერთ გადაწყვეტილებას არ მივიღებთ და არ მიგვიღია, რომელიც აზარალებს ანაკლიის პროცესს და ამას ვამტკიცებთ საქმით", — აღნიშნა მან.

მინისტრის პარლამენტში სიტყვით გამოსვლამდე ერთი თვით ადრე, 2 მაისს ეკონომიკის სამინისტროს ტექნიკური და სამშენებლო ზედამხედველობის სააგენტომ ფოთში ღრმაწყლოვანი ნავსადგურის მშენებლობაზე ნებართვის დოკუმენტი გამოსცა. ანაკლიის კონსორციუმმა ამ გადაწყვეტილებას შოკისმომგვრელი უწოდა. ნათია თურნავამ ეს დოკუმენტი 30 მაისს გააუქმა და აღნიშნა, რომ ეს გადაწყვეტილება მასთან შეთანხმებული არ იყო.