ბრაზილიის უზენაესმა სასამართლომ ჰომოფობიისა და ტრანსფობიის კრიმინალიზებას მხარი დაუჭირა. 11 მოსამართლიდან 6-მა მხარი დაუჭირა იმას, რომ გეებისა და ტრანსგენდერების მიმართ დამოკიდებულება რასიზმის ეკვივალენტია.

"ჰომოფობიურ ნიადაგზე ჩადენილი დანაშაული ისევე შემაშფოთებელია, როგორც ფიზიკური ძალადობა", — განაცხადა უზენაესი სასამართლო ვიცე-პრეზიდენტმა.

BBC-ის ინფორმაციით, ბრაზილიაში ჰომოფობიის კრიმინალიზებას ბოლო 20 წელია ცდილობენ, თუმცა ამას დიდი წინააღმდეგობა ხვდებოდა კონსერვატიული ჯგუფების მხრიდან. კათოლიკური ეკლესია ხშირად გამოდის გეების უფლებების წინააღმდეგ, ხოლო პრეზიდენტი ჟაირ ბოლსონარო ჰომოფობიური შინაარსის განცხადებებით გამოირჩევა.

გამოცემის ინფორმაციით, ჰომოფობიურ ნიადაგზე ჩადენილი დანაშაული რასიზმის შესახებ კანონის შესაბამისად დაისჯება, სანამ ქვეყნის საკანონმდებლო ორგანო ლგბტ თემის დასაცავად ახალ კანონს არ შექმნის.

2013 წლიდან ქვეყანაში გეი ქორწინება კანონიერია. ორგანიზაცია Grupo Gay da Bahia-ს მონაცემებით, ბრაზილიაში ლგბტ თემის მიმართ დანაშაულების რაოდენობა მსოფლიოში ერთ-ერთი ყველაზე მაღალია. 2018 წელს თემის 420 წევრი მოკლეს.