ზუგდიდის მეცხრე საარჩევნო უბანზე, ოპოზიციის მტკიცებით, ამომრჩევლების მოსყიდვის მიზნით ფულს არიგებდნენ. სავარაუდო მოსყიდვის მცდელობა ადგილზე პრესის აკრედიტაციით მყოფმა პირმა გიორგი რურუამ დააფიქსირა და ვიდეოზე გადაიღო, რასაც დაპირისპირება მოჰყვა.

"ვიდეოს ვიღებდი, ავსახე ის, რომ ფულის გადაცემის ფაქტები იყო, რასაც მოჰყვა დაპირისპირება. ამბობდა, რომ ვალი დამიბრუნაო და ვიდეოს გადაღების დროს შეურაცხყოფა მომაყენა, შემდეგ კი ფეხი დამარტყა", — ამბობს გიორგი რურუა.

გიორგი რურუამ აღნიშნა, რომ მის მიერ გადაღებულ ვიდეოს ნაციონალური მოძრაობა პრესკონფერენციაზე გაასაჯაროვებს.

მეცხრე საარჩევნო უბანთან ზუგდიდის პოლიციის უფროსი ირაკლი ფაცაციაც მივიდა, რომელმაც განაცხადა, რომ შეისწავლიან მოსყიდვის სავარაუდო ფაქტს და შესაბამის რეაგირებას მოახდენენ.

"ჯერ ვერაფერს გეტყვით. ხომ უნდა გამოვკითხო ორივე მხარე, შევისწავლო მომხდარი. გაირკვევა რასთან გვაქვს საქმე და თუ იქნება დანაშაულის ნიშნები, აუცილებლად დაიწყება გამოძიება", — თქვა ირაკლი ფაცაციამ.

ამ კომენტარის შემდეგ ირაკლი ფაცაციამ გიორგი რურუა, რომელიც ამბობს, რომ ფიზიკურად გაუსწორდნენ, დაკითხვაზე გადაიყვანა.

ამავე უბანზე ისევ მოხდა დაპირისპირება გაერთიანებული ოპოზიციის წარმომადგენლებსა და მოქალაქეებს შორის. ორივე მხარე აცხადებს, რომ საარჩევნო უბნებზე პროვოკაციებს აწყობენ.