ზუგდიდში გაერთიანებული ოპოზიციის დამკვირვებელი, ზოია ქვარცხავა ამბობს, რომ 87-ე უბანთან უცნობმა პირმა გაისროლა. გასროლის მოტივი უცნობია. ქალი გამოკითხვაზე გადაიყვანეს.

გაერთიანებული ოპოზიციის ლიდერის, თინა ბოკუჩავას თქმით, მათ მოახერხეს იმ პირის იდენტიფიცირება, რომელმაც 87-ე საარჩევნო უბანთან გაისროლა. მისივე ცნობით, გასროლა ფისტოლეტის ტიპის იარაღიდან განხორციელდა.

"ქალბატონმა ზოიამ შეძლო დაეფიქსირებინა მანქანის ნომერი. ჩვენ გაგვაჩნია ფოტომასალა და აღმოჩნდა, რომ ეს იყო იგივე მანქანა, რომელიც იმყოფებოდა საოლქო საარჩევნო კომისიაში 14 მაისს, სიების გატაცების მცდელობის დროს", — განაცხადა ბოკუჩავამ.

მისივე თქმით, ადამიანი, რომელმაც გაისროლა, ქართული ოცნების ზონდერია და მიმდინარეობს დაშინება ოპოზიიცის მხარდამჭერების. მან ასევე განაცხადა, რომ ქართულმა ოცნებამ იცის ვინ ისროლა, რადგან მისი ვინაობა თავადაც გაარკვიეს.

"ამ მანქანის მეპატრონე ირაკლი ჩაგელიაა, რონელიც დაბადებულია 1999 წელა, არის გალიდან", — თქვა ბოკუჩავამ. მან თავისი ბრიფინგზე ვიდეომასალაც გაასაჯაროვა

ოლქის თავმჯდომარე, ჟანა ყურუა ჟურნალისტებთან აცხადებს, რომ ქვარცხავამ მანქანის ნომერი ჩაინიშნა და იგი ერთადერთი თვითმხილველია.

ქართული ოცნების სიით კომისიის წევრი, თამარ ავეტისიანი ამბობს, რომ არ არის გამორიცხული, გასროლა დაშინების მიზნით მომხდარიყო.

"მივაკითხე 87-ე უბანს და დავინახე, რომ ორი ახალგაზრდა იდგა გარეთ. ერთს აღმართული ჰქონდა ხელი და გაისროლა. ერთ სკოლაში ორი საარჩევნო უბანია და ადვილი შესაძლებელი რომ დაშინების მიზნით ყოფილიყო", — ამბობს კომისიის წევრი.

მომხდარს გამოეხმაურა ქართული ოცნების შტაბის უფროსი ზუგდიდში, ირაკლი ჩიქოვანი. მისი თქმით, ამბავი არ არის გადამოწმებული და კომენტარს ვერ გააკეთებენ.

"ეს ინფორმაცია გადამოწმებული არ არის და კომენტარს ვერ გავაკეთებ, მაგრამ ჩვენ ეს ინფორმაცია გადავეცით შსს-ს და დამატებით ინფორმაციას მოგაწვდით", — აცხადებენ ქართულ ოცნებაში.

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 236-ე მუხლით დაიწყო, რაც იარაღის შეძენას, შენახვას ან გასროლას გულისხმობს.