ყოფილმა პრემიერმა, ბიძინა ივანიშვილმა, გადაცემაში - შეხვედრები რეგიონულ მედიასთან, განაცხადა, რომ მისთვის მიუღებელია ნაციონალური მოძრაობის საარჩევნო დაპირებები და ასევე გაურკვეველია, როგორ უნდა შექმნას ენმ-მ გამარჯვების შემთხვევაში 45 ათასი სამუშაო ადგილი:

"გუშინ თბილისში ვარაზისხევზე ავდიოდი და ვნახე რეკლამა, მელია და ხოშტარია, ერთად. გაურკვეველია როგორ პირდებიან 45 000 სამუშაო ადგილს, ამას მაინც არავინ შეეკითხება მათ. ამის მერე ეწერათ, რომ ეკონომიური დანაშულის დეკრიმინალიზაციას პირდებიან ხალხს. აი როგორ? მე პირდაპირ ხოშტარიაზე და მელიაზე ამას ვერ ვიტყვი, მაგრამ მათი კრიმინალური პარტიიდან ბევრი კრიმინალი იყო, პოლიტიკური დანაშაულის დეკრიმინალიზაციას პირდებიან საზოგადოებას და ეს აგრესია აუტანელი და მიუღებელია.

როგორი იყო მაშინდელი ეკონომიკა? როგორ იმართებოდა ბიუჯეტი ერთი ჯიბიდან? გაიხსენეთ ბოკერიას სამსახური, 40 მილიონი, 20 მილიონი, გამოტანილი დარიგებული მილიონები. ეს ანგარიშები არ ჩანს სად წავიდა".

ივანიშვილმა დასძინა, რომ ნაციონალური მოძრაობის დროს საქართველო "ყველაზე მაფიოზური სახელმწიფოების" რიგებში შედიოდა, ქართული ოცნების მმართველობის დროს კი ის თავისუფალი სახელმწიფო გახდა.

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.