საფინანსო-საბიუჯეტო კომიტეტის სხდომაზე მისულმა ფინანსთა მინისტრმა, ივანე მაჭავარიანმა ევროპული საქართველოს დეპუტატს, გიგა ბოკერიას უთხრა, რომ "შალიკო ნათელაშვილის" ფრაზებით საუბრობდა და ეს მას არ ეკადრებოდა. პასუხად ბოკერიამ განაცხადა, რომ მინისტრს მორალი არ უნდა წაეკითხა.

კამათი დეპუტატსა და მაჭავარიანის შორის მინისტრის შედარებამ გამოწივია, რომლითაც მან ეროვნული ბანკის პრეზიდენტთან, კობა გვენეტაძესთან უთანხმოების აღწერა სცადა. მაჭავარიანმა განაცხადა, რომ შეეცდებოდა პოპულარულ ენაზე აეხსნა რა საკითხებზე ჰქონდა განსხვავებული პოზიცია.

"ვისაც თინეიჯერი შვილი გვყავს, მე მყავს შვილი, ჩვენ ყველანი ვნერვიულობთ, რომ გვიან არ მოვიდნენ, რამე არ დაუშავდეთ. აი, სხვაობა გინდათ დავიყვანოთ ბატონი კობას და ჩემს მიდგომებს შორის: ის ამბობს, რომ 10 საათზე მოვიდეს ბავშვი სახლში და მე ვამბობ, რომ 12-მდე დატოვეთ", — განაცხადა მან.

პასუხად ბოკერიამ თქვა, რომ მინისტრს ცუდი ანალოგია გამოუვიდა, როცა საქართველოს მოსახლეობა ბავშვებს შეადარა.

"თქვენ ეს არ გეკადრებათ", — უთხრა მას მაჭავარიანმა და დაამატა:

"თუ ვინმეს ბავშვად მიაჩნია ეს ნიშნავს, რომ უფრო მეტს ზრუნავს და უფრო მეტს ნერვიულობს, თუ მაინცდამაინც ეგ გინდათ. ეს არის შალიკო ნათელაშვილის მოხდენილი ფრაზები და ეს თქვენ არ უნდა გეკადრებოდეთ".

მაჭავარიანმა განმარტა, რომ ეროვნული ბანკის პრეზიდენტთან ძირითად საკითხებზე თანხმდებიან და "უმნიშნველო უთანხმოება" აქვს შემოსავლების დადასტურების მექანიზმსა და ოდენობაზე.

ფინანსთა მინისტრის დღეს, 23 აპრილს საფინანსო-საბიუჯეტო კომიტეტში მოსმენაზე უსმენენ. მაჭავარიანი ევროპულმა საქართველომ დაიბარა.