მოძრაობა სახელმწიფო ხალხისთვის ერთ-ერთი ლიდერმა, ზურა ჯაფარიძემ განაცხადა, რომ ხელისუფლება აუდიტის სამსახურის მეშვეობით იმ ბიზნესმენების დაშინებას ცდილობს, რომლებიც პარტიას აფინანსებენ:

"არანაირი კონკრეტული დარღვევა არ ყოფილა, გასაგებია რასაც აკეთებს აუდიტის სამსახური. ამის მთავარი მიზანი არის არა იმ ადამიანების დასჯა, ვინც ამ შემოწმებას ახორციელებს, არამედ მთავარი მიზანი არის ის, რომ გააგზავნონ გზავნილი ზოგადად მთელს ქვეყანაში, რომ ჩვენთვის ფინანსური დახმარება არის პრობლემა და მათ შემდეგ შეიძლება შეექმნათ პრობლემები".

პაატა ბურჭულაძე კი განმარტავს, რომ მასსა და მის მიერ დაარსებულ მოძრაობაზე ზეწოლა არის ერთ-ერთ ნათელი მაგალითი იმისა, რომ სისტემა და მეთოდები არ შეცვლილა, შეიცვალნენ მხოლოდ შემსრულებლები:

"ჩვენ გვითვალთვალებენ, გვისმენენ, ზეწოლის ქვეშ არიან ის ბიზნესმენები, ვინც მხარს უჭერენ ჩვენს პარტიას. საქართველოში პოლიტიკა იქამდე იქნება ბინძური საქმიანობა, სანამ ჩვენ შევეგუებით რომელიმე მხარის ბინძური მეთოდებით ქმედებას. უზნეობაა, როდესაც პაატა ბურჭულაძის დისკრედიტაციისთვის შეეცდები ზიანი მიაყენო ჩემი ცხოვრების ყველაზე საამაყო საქმეს, საქველმოქმედო ფონდ იავნანას, რომელმაც პირდაპირი გაგებით არა ერთი ბავშვისა და ოჯახის სიცოცხლე იხსნა. უზნეობაა, როდესაც იჭრები პირად სივრცეში იმ მიზნით, რომ პაატა ბურჭულაძის ავტორიტეტს ავნო, იწყებ სრულიად უსაფუძვლო ჭორების გავრცელებას. ჩვენ ყველანი დაუყოვნებლივ შესაცვლელი და მწარე რეალობის წინაშე ვდგავართ".

გარდა ამისა, ბურჭულაძე ყოფილი პრემიერმინისტრისგან, ბიძინა ივანიშვილისგან საჯარო ბოდიშის მოხდასაც ითხოვს, რადგან ამ უკანასკნელმა განაცხადა, რომ ბურჭულაძემ ქართული ოცნების მხარდაჭერის სანაცვლოდ, გარკვეული თანხა მოითხოვა:

"ჩვენს ქვეყანას მართავს არა მთავრობა, არამედ არაფორმალური მმართველი, რომელსაც შეუძლია საჯაროდ იცრუოს. ბიძინა ივანიშვილმა საკუთარი თავი ამხილა, ის არის მატყუარა და მისგან მოვითხოვ საჯარო ბოდიშის მოხდას არაერთი ცილისმწამებლური განცხადების გამო".

მოძრაობა სახელმწიფო ხალხისთვის ახალგაზრდული ორგანიზაციის ნაწილმა დატოვა, რასაც ბურჭულაძე ზეწოლის შედეგად მიღებულ გადაწყვეტილებად აფასებს.

ამასთან,14 სექტემბერს, ნიკა გვარამიასა და პაატა ბურჭულაძეს შორის სატელეფონო საუბრის აუდიო ჩანაწერი გავრცელდა. ჩანაწერი ატვირთულია YouTube-ზე, georgia-news.org-ის სახელწოდებით გახსნილ არხზე, რუსული სათაურით: ნიკა გვარამია აკონტროლებს "დამოუკიდებელ" პოლიტიკოსებს (Ника Гварамия контролирует "независимых" политиков).

გვარამია აცხადებს, რომ ნამდვილად ღია ხაზზე ესაუბრა პარტია სახელმწიფო ხალხისთვის ლიდერს პაატა ბურჭულაძეს, რადგან დასამალი არაფერი ჰქონდა. ის თავისი სატელეფონო ჩანაწერის გავრცელებაში სახელმწიფო უსაფრთხოების სამსახურს ადანაშაულებს.