ქართულმა ოცნებამ მთაწმინდის საარჩევნო ოლქში მაჟორიტარი დეპუტატობის კანდიდატად ექიმი ლადო კახაძე ოფიციალურად წარადგინა. კახაძის წარდგენაზე სიტყვით გამოვიდნენ პრემიერ-მინისტრი მამუკა ბახტაძე და ქალაქის მერი კახა კალაძე.

ბახტაძემ განაცხადა, რომ მთაწმინდა არის გამორჩეული ადგილი ქვეყნისა და დედაქალაქისთვის, ამიტომ "გამორჩეული კანდიდატი" წარადგინეს. კალაძემ კი აღნიშნა, რომ მთაწმინდა თბილისის გულია და შეარჩიეს "სიკეთის მთესველი კანდიდატი", რომელიც როგორც ნამდვილი ექიმი ყველას გადარჩენაზე ზრუნავს.

"სწორედ ეს მიდგომა, ეს დამოკიდებულებაა ის, რაც ბოლო დროს ჩვენს ყოველდღიურობას და მითუმეტეს პოლიტიკას ძალიან აკლია", — განაცხადა კალაძემ.

სიტყვით გამოსვლისას ლადო კახაძე სცენაზე შვილიშვილებთან ერთად ავიდა და თქვა, რომ ისინი მთაწმინდაზე არიან დაბადებული და გაზრდილი. მანვე აღნიშნა, რომ ისინი მეოთხე თაობის მთაწმინდელები იყვნენ და მათი მშობლების თაობა "დაბადებამდე უნახავს", ამიტომ მათ "ვერასდროს უღალატებს".

კახაძემ მადლობა გადაუხადა ახალგაზრდებს იმისთვის, რომ "მშობლების ზურგშექცევით დგომა" არ გადაუწყვეტიათ. ასევე მადლობა გადაუხადა წარმდგენებს, ქართულ ოცნებას და განაცხადა, რომ "ოცნება რეალიზებულია".

ექიმი ლადო კახაძე ქართულმა ოცნებამ ჯერ კიდევ 25 მარტს წარადგინა. მაშინ პარტიის პოლიტიკურმა მდივანმა, ირაკლი ღარიბაშვილმა განაცხადა, რომ კახაძისთვის მთაწმინდაზე ზრუნვა უცხო არ არის და ის პოზიტიურ ენერგიას შემატებს გუნდს.

მთაწმინდის საარჩევნო ოლქში არჩევნები 2019 წლის 19 მაისს გაიმართება. ხმის მიცემის პროცესი 31 საარჩევნო უბანზე წარიმართება, სადაც, საერთო ჯამში, 43 868 ამომრჩეველია რეგისტრირებული