განათლების კომიტეტის თავმჯდომარის, მარიამ ჯაშის განცხადებით, კომიტეტი ზოგადი განათლების შესახებ კანონის მე-3 მუხლიდან სიტყვა "ლიბერალურის" ამოღებას მხარს არ დაუჭერს. ამის შესახებ ჯაშმა პარლამენტის პლენარულ სხდომაზე ისაუბრა.

"მინდა, მივმართო ჩვენს საზოგადოებას, განსაკუთრებით ახალგაზრდებს, სტუდენტებს, ასევე პედაგოგიურ კორპუსს, ჩვენს პროფესორ-მასწავლებლებს, რომელთა მხრიდან არასწორი ინფორმაციის საფუძველზე მოხდა ვფიქრობ, საკმაოდ საფუძვლიანი კრიტიკის გაჟღერება. კომიტეტს არ დაუჭერია და არ დაუჭერს მხარს ლიბერალურ-დემოკრატიულ ღირებულებებზე დამყარებული სამოქალაქო ცნობიერების ჩამოყალიბების ჩანაწერის ამოღებას", — თქვა ჯაშმა.

მისი განმარტებით, კომიტეტმა განიხილა ინიციატივა, რომლის მთავარი პრინციპული მიზანი იყო ზოგადი განათლების კანონის მე-3 მუხლის დაახლოება ბავშვის უფლებათა დაცვის კონვენციის 29-ე მუხლთან.

ჯაში განმარტავს, რომ ინიციატივას პრინციპების დონეზე დაუჭირეს მხარი და არა კანონიდან კონკრეტული ჩანაწერის ამოღებას ან ჩანაცვლებას.

"არამხოლოდ მე ვეწინააღმდეგებოდი ჩანაწერიდან ამ სიტყვის ამოღებას, არამედ განათლების სამინისტროს მხრიდან იყო წარმოდგენილი უარყოფითი პოზიცია ამ საკითხთან დაკავშირებით, იგივე პოზიცია იყო სახალხო დამცველის აპარატის მხრიდან", — დასძინა მარიამ ჯაშმა.