Cardi B-სთვის 2019 წელი კარგად დაიწყო. ის გრემის ისტორიაში შევიდა, როგორც პირველი ქალი, რომელმაც წლის საუკეთესო ჰიპ-ჰოპ ალბომის ნომინაციაში გაიმარჯვა.

თუმცა, Cardi B-ის მიერ უმოკლეს დროში აშენებულ ჰიპ-ჰოპის იმპერიას საფრთხე ემუქრება, რისი მიზეზიც რეპერის წარსულია.

ცოტა ხნის წინ ინტერნეტში ამოტივტივდა ვიდეო, რომელშიც შემსრულებელი ამბობს, რომ სტრიპტიზიორად მუშაობის პერიოდში ის სასტუმრო ოთახში კაცებს ხვდებოდა, მათ ნარკოტიკული საშუალებებით ათრობდა და ასე იღებდა მათგან, მისი სიტყვებით, კუთვნილ თანხას.

ვიდეო რეპერს სამი წლის წინ აქვს გამოქვეყნებული ინსტაგრამზე.

იქამდე, სანამ ინტერნეტი მსჯელობდა, იმსახურებდა თუ არა კრიმინალური წარსულის მქონე რეპერი ქალი წარმატებულ კარიერას, Cardi B-მ კრიტიკოსებს ინსტაგრამზე, აწ უკვე წაშლილი, პოსტით უპასუხა.

"ეს შესაძლოა ჩემი ცხოვრების არასწორი გადაწყვეტილებები იყო, მაგრამ მე ამის გაკეთება გადასარჩენად მიწევდა. მე არასდროს მითქვამს, რომ სრულყოფილი ვიყავი, ან სრულყოფილი სამყაროდან მოვდიოდი".

რეპერი ასევე უპირისპირდება ბრალდებას, რომ წარმატება და პოპულარობა შრომის გარეშე მოიპოვა. მისი სიტყვებით, ჰიპ-ჰოპ კულტურაში ყველა თამამად ყვება თავის წარსულს და იმ გზას, რაც გაიარა.

ის ასევე აღნიშნავს, რომ რეპერების ნაწილი "მკვლელობას, ძალადობას, ქურდობასა და ნარკოტიკის მოხმარებას" აქებს, თუმცა ის მათ რიგებში თავს არ მოიაზრებს.

ტვიტერის მომხმარებლების ნაწილმა Cardi B კომიკოს ბილ კოსბის შეადარა, რომელსაც ქალების დათრობასა და სექსუალური ძალადობისთვის პატიმრობა მიესაჯა.