პარტია ევროპული საქართველო ია კერზაიას საქმეზე პარლამენტის განათლების კომიტეტში მთავარ პროკურორს იბარებს. პარტია ასევე ითხოვს, რომ აიღოს პოლიტიკური პასუხისმგებლობა განათლების მინისტრმა მიხეილ ბატიაშვილმა და შეიქმნას განათლების კომიტეტში ია კერზაიას საქმეზე მოკვლევის ჯგუფი. ეს პირობები ევროპული საქართველოს წევრმა სერგი კაპანაძემ დღეს, 26 მარტს პარლამენტში გამართულ ბრიფინგზე წამოაყენა. მისივე თქმით, სამართლიანი არჩევნების ანგარიშმა დაადასტურა ეჭვები, რომელიც მათ ჰქონდათ.

"მეოთხე თვეა საზოგადოება ელოდება პასუხებს ია კერზაიას საქმესთან დაკავშირებით. ამ საკითხზე განათლების მინისტრის პარლამენტში მოსვლიდან გავიდა თვეზე მეტი დრო. პროკურატურა დაიწყო გამოძიება, მაგრამ არც ერთი შედეგი არ დაუდია და არც ერთი ადამიანი არ დასჯილა. ის ადამიანები, რომლებიც მონაწილეობდნენ ზუგდიდის მეექვსე საჯარო სკოლის ეგზეკუცია და მეორე მხრივ, რომლებიც იბარებდნენ კერზაიას და მასზე ახორციელებდნენ ზეწოლას, მხედველობაში მაქვს ზუგდიდის რესურსცენტრის ხელმძღვანელი ბატონი ფარცვანია რჩება თანამდებობაზე. ყველა ის ეჭვი, რომელიც კითხვებად გვქონდა, ფაქტობრივად დადასტურდა ISFED-ის კვლევის შემდეგ. გამოჩნდა, რომ ამ საქმეს სისტემური ხასიათი ჰქონდა და რადგან ერთი და იგივე შინაარსის, ერთი და იგივე სიტყვების გამოყენებით მსგავსი საჩივრები შედიოდა ძალიან მოკლე დროში განათლების სამინისტროს სისტემაში", — განაცხადა სერგი კაპანაძემ.

ის ასევე აღნიშნავს, რომ მთავარი პროკურორის პარლამენტში მოსასვლელად განათლების კომიტეტის წევრი დეპუტატების უმრავლესობის მხარდაჭერა სჭირდებათ, ამიტომ ინდივიდუალურად, ყველა მათგანს მიმართავენ.

"პირველ რიგში, იმისთვის, რომ ამ საქმეს მოეფინოს ნათელი მნიშვნელოვანია, განათლების მინისტრმა აიღოს პოლიტიკური პასუხისმგებლობა. ევროპული საქართველო ითხოვს მთავარი პროკურორი მოვიდეს განათლების კომიტეტში და ამ საქმესთან დაკავშირებით მოხსენება წარუდგინოს კომიტეტს. ამის მისაღწევად ჩვენ გვჭირდება კომიტეტის წევრების ინდივიდუალური მხარდაჭერა ამიტომ მივმართავთ კომიტეტის წევრებს, რომ მათაც აიღონ პასუხისმგებლობა მოიწვევენ პროკურორს თუ არ მოიწვევენ, მესამე ახალი რეგლამენტის მიხედვით კომიტეტებს შეუძლიათ ჩაატარონ თემატური მოკვლევა სხვადასხვა თემაზე. დღესვე მივმართავთ განათლების კომიტეტს, შეიქმნას თემატური ჯგუფი, რომელიც ია კერზაიას საქმეზე ჩაატარებს მოკვლევას და მეორე მხრივ სკოლის მასწავლებელზე და დირექტორებზე განხორციელებულ ზეწოლაზე ჩაატარებს მოკვლევას", — განაცხადა სერგი კაპანაძემ საგანგებო ბრიფინგზე