ახალმა ზელანდიელმა ქალებმა მუსლიმი თემის მხარდაჭერის ნიშნად მთელი ქვეყნის მასშტაბით თავსაბურავების გაკეთება დაიწყეს. ქალაქ კრაისტჩერჩის ორ მეჩეთზე თავდასხმიდან ერთი კვირის თავზე ისინი სოციალურ ქსელებში თავსაბურავიან ფოტოებს დებენ და წერენ, რომ დაღუპულებსა და მათ ოჯახებს სოლიდარობას უცხადებენ. 15 მარტსი თავდასხმისას 49 ადამიანი დაიღუპა.

Reuters წერს, რომ იდეა ექიმს ოკლენდიდან, თაია აშმანს ეკუთვნის. აშმანმა იდეა მას შემდეგ გააჟღერა, რაც გაიგო, რომ ერთ-ერთ ქალს სახლიდან ჩადრით გასვლის ეშინია, რადგან ჰგონია, რომ თავსაბურავის გამო ტერორისტების სამიზნე გახდება:

"მინდოდა მეთქვა, რომ ჩვენ თქვენთან ვართ, გვინდა, რომ ქუჩაში თავი იგრძნოთ, როგორც სახლში. ჩვენ გვიყვარხართ, მხარს გიჭერთ და პატივს გცემთ", — ამბობს აშმანი.

როდესაც 22 მარტს მოქალაქეები ლოცვისას კრაისტჩერჩის ერთ-ერთი მეჩეთის წინ შეიკრიბნენ, ქალებს თავსაბურავები ეკეთათ.

"რატო მიკეთია დღეს თავსაბურავი? ჩემი ძირითადი მიზეზი ისაა, რომ თუ ვინმე ისევ დადის იარაღის ქნევით, მინდა, რომ მასსა და იმ ადამიანს შორის ჩავდგე, ვისკენაც შეიძლება, რომ ეს იარაღი მიშვერილი იყოს. არ მინდა, რომ მან [თავდამსხმელმა] რაიმე განსხვავება იპოვოს, რადგან განსხვავება არ არსებობს", — ყვება ერთ-ერთი ქალი.

ახალი ზელანდიის პრემიერ-მინისტრმა, ჯასინდა არდერნმა დიდი მოწონება დაიმსახურა მას შემდეგ, რაც მუსლიმ თემთან შეხვედრისას შავი თავსაბურავი გაიკეთა.

ფოტო: AP